Izet Haxhia kërcënon Berishën me bisedat e gjetura në telefonin e Azem Hajdarit
Izet Haxhia pret të ekstradohet në Shqipëri pas vendimit të Gjykatës së Lartë të Turqisë. Në një intervistë për "Dita", Haxhia shprehet se kur të kthehet këtu do të kërkojë rihapjen e çështjes së vrasjes së Azem Hajdari, nga ku sipas tij do të dalin shumë të vërteta.

Ndër të tjera, ai ka përmendur edhe tabulatet e telefonit të Hajdarit, të cilat thotë se i disponon.

Pjesë nga intervista

Keni besim se kjo mund të ndodhë? Dhe nëse nuk ndodh, çfarë do të bëni?

– Unë nuk kam besim tek kjo drejtësi e sotme që ekziston, sepse e ka treguar me vepra që është në shërbim të Berishës dhe klanit të tij kriminal, që nuk ka guxuar të thërrasë asnjëherë para drejtësisë Berishën e bashkëpunëtorët e tij për krime të hapura e dokumentuara si “21 janari”, “Gërdeci” etj..

Besimi im qëndron tek organet e reja të drejtësisë që do krijohen pas vetingut, po nuk arritën dhe ato të sjellin Berishën para drejtësisë, atëherë vaj halli i këtij vendi të drobitur nga padrejtësitë dhe krimet e politikës 27 vjeçare.

Keni folur se keni tabulatet e telefonatave të Azemit me Sali Berishën pak para vrasjes. Si i keni gjetur dhe pse nuk i keni sjellë më parë?

– Akuza ndaj meje për të cilën edhe jam dënuar ka qenë që, unë kam telefonuar Hajdarin, e kam nxjerrë nga selia e PD dhe pastaj e kanë vrarë. Mirë, po e pranoj këtë akuzë… por, ku është telefoni i Hajdarit ?

Kush e zhduku pa e ngritur trupin e tij të bërë shoshë nga plumbat? Kujt i intereson të zhdukej ai telefon? Pse në hetime, apo gjykim nuk u nxor ai telefon dhe telefonatat që ka bërë Hajdari dhe i kanë bërë? Kush ia ka bërë këto telefonata që kur ishte në Lushnje? Nga telefoni i kujt? Në emër të kujt ka qenë ky numër telefoni?

Kush e përdorte këtë telefon? Këto tabulate ekzistojnë dhe duhet të dalin në dritë dhe aty del gjithë dinamika e asaj ditë të vrasjes dhe personat e përzier. Unë në jetën time nuk kam përdorur telefon celular sa kam qenë në Shqipëri. Kush ka përdorur e folur atë ditë e mbrëmje duhet të përgjigjet para drejtësisë.

Shtuar më 13/02/2018, ora 09:54

Shkruani komentin tuaj!
Të fundit nga kjo kategori