Iu dha lamtumira e fundit Fadil Feratit
Albeu.com
Mijëra qytetarë nga komuna e Istogut dhe nga vende të ndryshme të Kosovës i kanë dhënë lamtumirën e fundit nënkryetarit të Lidhjes Demokratike të Kosovës, njëherësh edhe kryetarit të Istogut, Fadil Ferati.
Qysh nga orët e hershme turma të mëdha të qytetarëve dhe delegacione të shumta të niveleve të ndryshme të Kosovës, duke përfshirë atë nga Kryesia e Kuvendit të Kosovës, Presidencës, të Qeverisë së Kosovës, përfaqësues të Zyreve diplomatike ndërkombëtare, të subjekteve politike nga qendra dhe komunat e ndryshme të Kosovës, përfaqësues të FSK-së, të PK-së, të, KFOR-it, të Bashkësisë Islame dhe Ipeshkvisë së Kosovës. Ndërkaq, në orët e pasditës, në ambient të hapur, para Pallatit të Kulturës në Istog, nën patronatin e presidentit Sejdiu, është mbajtur edhe ceremonia mortore, ku morën pjesë mijëra qytetarë nga mbarë Kosova. Në këtë ceremoni mortore, i pari i vendit Fatmir Sejdiu ka shprehur dhembjen e tij për humbjen e njeriut që gati për dy dekada, punoi për lirinë, pavarësinë dhe shtetësinë e Kosovës.

Sejdiu, me këtë rast tha se “sot po e përcjellim në botën e amshueshme Fadil Feratin, kryetar i Istogut dhe nënkryetar i LDK-së. Gjatë këtyre katër ditëve zemra e tij pushoi së rrahuri kur ne e kemi kujtuar me mall e dhembje çastet e punës sonë. Ne kemi veçuar sukseset që ai ka arritur si udhëheqës i Istogut dhe nënkryetar i LDK-së.

Fadil Ferati udhëhoqi komunën e Istogut në tri mandate. Besimi i qytetarëve të kësaj komuneje iu dha atij edhe në zgjedhjet e para. Fitorja e tij e katërt
është pothajse unikate jo vetëm në këto zgjedhje, porn ë gjithë historikun e
zgjedhjeve që ka mbajtur Kosova. Fadil Ferati kishte fituar besimin e
qytetarëve dhe doli fitues edhe për të katërten herë, ndonëse nuk arriti të
paraqiste vizionin e tij për Istogun për mandatin e ri katërveçar. Fadil Ferati
ishte zëri i parë i qytetarëve të Istogut. Sot kur po ndahemi përfundimisht prej tij mund të theksoja pa hezitim se Fadil Ferati ishte njeriu që gëzonte njëkohësisht besimin e bashkëvendasve të tij në komunën e Istogut, por edhe të institucioneve qëndrore të Republikës së Kosovës”. “Duke shikuar prapa prej punës dhe veprimtarisë së tij ai e la Istogun pa prijësin dhe Prishtinën pa një personalitet që kishte një mbështetje të fuqishme të bazës nga vinte. Kjo e bënte atë si njeri me autoritet të madh kudo”, tha në fjalën e tij mortore presidenti Sejdiu, duke u shprehur ngushlime qytetarëve të Istogut dhe të Kosovës për vdekjen e kryetarit Ferati.

Një fjalë rasti, në këtë ceremoni mortore, në emër të strukturave
komunale e mbajti edhe nënkryetari i komunës së Istogut, njëherësh edhe
nënkryetar i Degës së LDK-së, Haki Rugova. Ai vdekjen e kryetarit Ferati e ka cilësuar si humbje të madhe për Istogun dhe institucionet e saj, duke u
zotuar se do të ndjekin rrugën e tij.

Në emër të familjes Ferati, pjesëmarrësit e ceremonisë mortore i ka
falënderuar Sami Ferati.

Funerali i të ndjerit Ferati është nisur drejt vendlindjes së tij, përkatësisht varrezave të Gurrakocit, ku në orët e vona të pasditës, është varrosur në prani të familjarëve, miqve, bashkëpunëtorëve të tij, si dhe të qindra qytetarëve. (koha)
Shtuar më 04/02/2010, ora 01:32
Tage: arkiv
Shkruani komentin tuaj!
Të fundit nga kjo kategori