Rreth 200 zogj kanë ngordhur gjatë natës në rrethana misterioze pranë një fshati në Britani. Zogjtë u gjetën mes ëaterston dhe Hazelbeach në Pembrokeshire të enjten në mbrëmje. Redaktori i “Pembrokeshire Herald”, Tom Sinclair tha: “Kishte mbi 50 zogj në rrugë dhe mund t’i dëgjoje të gjithë në gardhe, duke cicëritur dhe duke bërë zhurmë.”
“Shoqëria Mbretërore për Mbrojtjen e Zogjve” tha se zogjtë mund të jenë shqetësuar nga streha e tyre e mbrëmjes. Organizata bamirëse e kafshëve të egra tha: “Kur kjo ndodh gjatë natës, mund të shkaktojë që ata të përplasen me tokën pasi çorientohen”. “Megjithatë, do të nevojiten ekzaminime të mëtejshme për të konfirmuar shkakun e këtij incidenti”.
Këshilli i Pembrokeshire konfirmoi se 200 zogj ishin gjetur të ngordhur në rrugë dhe tha se nuk dihej se si kishin ngordhur raporton “BBC”. Zoti Sinclair shtoi: “Në valën e parë njerëzit më thanë se këshilli mblodhi 10 çanta kosh dhe unë isha atje më vonë, kështu që mendoj se disa qindra, nëse jo 1000 kanë ngordhur”. “Unë isha aty rreth orës 23:30 dhe ata ende po binin nga qielli. Ishte sikur të kishin ngordhur para se të binin në tokë”.
Zoti Sinclair tha se dikush e telefonoi në shtëpi dhe i’u deshën gjysmë ore për të arritur atje. Ai tha se këshilli kishte qenë dhe kishte ikur deri në atë pikë. “Kam pasur përshtypjen se po binin nga një lartësi dhe isha i shqetësuar për makinën time, por kisha parkuar pak më larg,” shtoi ai.
“Nuk e di se çfarë ka ndodhur, vërtet nuk e di, nuk mund të mendoj se ishte një zog grabitqar, ata nuk po fluturonin dhe po binin në rrugë, po binin të ngordhur”. “Unë pyesja veten nëse ata ishin helmuar apo ndoshta ishin zogjtë që migruan dhe ishte vërtet ftohtë, ndoshta ngrinë dhe ngordhën”.
Banorja Claire Eaton shkoi në zonë rreth orës 23:00. Ajo tha: “Ishte vërtet traumatike, në rrugë kishte mjaft zogj të ngordhur. Pashë një blic në qiell rreth një orë më pare”. “Ishte si diçka nga një film horror. Unë mendoj se shkaku i kësaj është krijuar nga njeriu dhe njerëzit duhet të respektojnë jetën tonë të egër”.
Ajo mori një zog të “shtangur” në shtëpi dhe po planifikon ta lëshojë atë në mëngjes. Këshilli i Qarkut Pembrokeshire tha se kishte marrë një telefonatë rreth orës 21:00 të ditës së enjte. Një zëdhënës tha: “Oficerët kontrolluan vendin dhe rreth 200 zogj u gjetën të ngordhur në rrugë”.
“Autoriteti ndërmori një pastrim dhe largoi zogjtë e ngordhur nga vendi. Nuk ka asnjë tregues të qartë për shkakun e këtyre ngordhjeve. Ne e kemi raportuar incidentin në Agjencinë e Shëndetit të Kafshëve dhe Bimëve”./albeu.com/
