Marrja e mandatit të Presidentit nga Bujar Nishani pritet të pasojë edhe lënien e mandatit të deputetit. Referuar Kodit Zgjedhor, kur një deputet lë ose humbet mandatin, ai fitohet nga kandidati pasues në listë. Referuar rezultatit të zgjedhjeve të vitit 2009, PD ka marrë 15 mandate parlamentare, ndaj edhe nëse largohet Nishani, radha për të marrë mandatin e tij i takon kandidatit me numër 16.

Portali Albeu njofton se këtë numër në listë e mban profesori Vath Tabaku, i cili me shumë gjasa do të pranojë mandatin e deputetit për një periudhë 1 vjeçare, sa ka mbetur deri në zgjedhjet pasardhëse. Tabaku është dekan i Fakultetit të Shkencave Pyjore në Universitetin e Kamzës ndërsa ka kryer doktoraturën në Gjermani.

Megjithatë, Nishani mbante edhe mandatin e ministrit të Brendshëm, çka do të thotë se ikja e tij do të shënojë ndryshime në kabinetin qeveritar. Varianti që përflitet më së shumti është ai i marrjes së këtij dikasteri nga Ilir Meta, një post që është lidhur edhe më parë me emrin e kreut të LSI-së. Gjithsesi, nuk përjashtohet edhe mundësia e ndryshimeve të tjera brenda kabinetit, mbase me ripozicionime të ministrave dhe me futje të reja në kabinet nga ana e grupit të PD-së. /albeu.com/