I vuri zjarrin pyjeve për kullotat, arrestohet autori 28-vjeçar në Fier

Ka rënë në prangat e policisë, 28-vjeçari që shkaktoi zjarrin në Peshtan të Fierit.

Policia bën me dije se autori kishte ndezur zjarr për hapjen e kullotave dhe si pasojë e përhapjes së flakëve u dogj një sipërfaqe e madhe pyjore.

Njoftimi Policisë

Ndezi zjarr për hapjen e kullotave dhe si pasojë e përhapjes së flakëve u dogj një sipërfaqe e madhe pyjore, identifikohet dhe arrestohet në flagrancë 28-vjeçari.

Strukturat e Komisariatit të Policisë Fier, në vijim të veprimeve për identifikimin dhe vënien para përgjegjësisë ligjore të autorëve të zjarrëvënies të qëllimshme apo nga pakujdesia, bënë të mundur identifikimin dhe arrestimin në flagrancë të shtetasit K. Z., 28 vjeç, banues në fshatin Peshtan, pasi dyshohet se ka ndezur zjarr në pyllin e këtij fshati dhe për pasojë është djegur një sipërfaqe e konsiderueshme pylli me shkurre dhe pisha.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme, për veprën penale “Shkatërrimi me zjarr i pyjeve dhe mjedisit pyjor”.

Drejtoria Vendore e Policisë e Policisë Fier apelon për të gjithë banorët, që në asnjë rast të mos ndezin zjarre, pasi do të përballen me ligjin.

Policia fton qytetarët që të denoncojnë në numrin 112, për çdo rast të zjarrvënies apo të paligjshmërisë në tërësi, duke iu garantuar anonimatin dhe reagim të shpejtë e të paanshëm nga strukturat policore./albeu.com/


Shtuar 22.07.2023 11:13