I kafshoi hundën gruas për tradhti, lihet në burg emigranti
Pëlqej
Gjykata vendosi të lëtë dje në burg, emigrantin 41 vjeçar Shkëlqim Hysaj për akuzën e plagosjes së rëndë me dashje dhe dhunës në familje, pasi i ka prerë hundën së shoqes.

Këtë akt ai e kishte bere pasi e shoqja, Mariana, e ka tradhtuar kur ai ndodhej emigrant në Greqi.

“Unë e kafshova në hundë time shoqe dhe ia këputa, sepse ndonëse më tradhtoi, unë e fala, lashë Poliçanin ku jetonim dhe erdhëm në Tiranë për t’i dhënë një mundësi martesës, por ajo donte të më vriste. Në kohën që unë punoja në Greqi, djali ynë e kapi në shtëpi me dikë tjetër e për shkak të dhunës ai tani ndodhet në burg. Unë e fala, por në orën 05:30 të mëngjesit, ditën e shtunë, kur unë po flija, ajo hyri në dhomë për të më vrarë. Madje më këputi edhe gishtat. Atëherë, në gjaknxehtësi e sipër unë i këputa hundën”, ka treguar i pandehuri.

Por prokurori Ervin Karanxha pretendon se ky episod nuk ka ndodhur në sherr e sipër.

“Si pasojë e kafshimit, një pjesë e hundës ka rënë në tokë dhe është dëmtuar. Në këtë rast kemi plagosje me dashje dhe dhunë në familje, akuza të parashikuara në Kodin Penal. Hunda që ka rënë në tokë është sekuestruar në cilësinë e provës materiale”, ka deklaruar Karanxha.

Ndërkohë, avokatja Vjollca Pustina i kërkoi gjykatës të vendosë masën ‘detyrim paraqitjeje’ për Hysajn, pasi sipas saj klienti i saj është viktima në këtë rast. /albeu.com/
Shtuar më 05/09/2014, ora 10:29
Shkruani komentin tuaj!
Të fundit nga kjo kategori