I fejuari i Amarilda Lekës tregon si e njohu juristen mashtruese: Një mik i dha 45 mijë euro
I fejuari i Amarilda Lekës, juristes që mashtronte të afërmit e të dënuarve dhe duke u shtirur si jurist u premtonte atyre lirinë në këmbim të shumave të majme parash ka treguar së fundmi se si është njohur me 30-vjeçaren.

I marrë në pyetje nga Prokuroria, personi me inicialet J.G., ka rrëfyer se Lekën e ka njohur nëpërmjet rrjetit social Facebook, ku ‘juristja’ i është prezantuar si gjyqtare pranë Krimeve të Rënda.

Në dëshmi, i fejuari i ‘juristes’ rrëfen se 30-vjeçarja e lënë tashmë në burg për mashtrim, ka marrë ‘në qafë’ edhe babain e një miku të tij. Ndër të tjera ai tregon se Leka i ka treguar se shkollën e ka mbaruar në Amerikë dhe se ka pasur gjithmonë njerëz me pushtet rreth saj.

Në dosjen e Prokurorisë në ngarkim të shtetases, Amarilda Leka, e cila është arrestuar për mashtrim, pasi akuzohet se i ka marrë një personi 60 mijë euro, është marrë edhe dëshmia e të fejuarit të saj.

J.G, ka deklaruar gjithashtu edhe një rast, ku një shok i tij i ka kërkuar ndihmë Lekës, duke u shprehur se një miku i të atit kishte një hall.

“Kam një mikun e babait që ka një hall. Të lutem bisedo ta ndihmosh”– Mësohet të ketë thënë shtetasi A.M (shoku i të dashurit) në një kafe në rrugë ‘Myslym Shyri” në Tiranë.


“Do shoh çfarë do bëj. Por, ma sill ta takoj”- mësohet t’i jetë përgjigjur Leka. Ky komunikim ka mjaftuar për ‘juristen’ që të krijonte lidhjet me shtetasin B. Zeneli, i cilit i ka dhënë asaj rreth 60 mijë euro për ta “ndihmuar” për nxjerrjen e kunatit nga burgu.

Ndërkohë pas dy takimeve me shtetasin B.Zeneli, Amarilda i ka thënë të dashurit të saj që: “Do t’ia kryej porosinë B…, pasi në lokal kur pimë kafe herën e fundit, më ka dhënë 45 mijë euro dhe këto euro ja dhashë dikujt, një personi me pushtet.”

I dashuri i Lekës tregon në dëshmi se ajo ia ka thënë edhe emrin e këtij personi me pushtet por që atij nuk i kujtohet.

Gjykata e Krimeve të Rënda, ka dhënë sot masën e sigurisë për Amarilda Lekën, duke e lënë atë me “arrest në burg”. Amarilda Leka u arrestua pak ditë më parë pasi akuzohet se mashtroi të afërmin e një vrasësi duke i marrë 50 mijë euro. Në këmbim ajo premtoi se të dënuarin me 30 vite burg për vrasje, me iniciale A.M,do e lironte./panorama
Shtuar më 18/11/2019, ora 20:17

Shkruani komentin tuaj!
Të fundit nga kjo kategori