Holanda ndihmon Shqipërinë në fushën e drejtësisë
Kryetari i Gjykatës së Lartë, Xhezair Zaganjori ka pritur në një takim këtë të mërkurë Ambasadorin e Mbretërisë së Holandës në Tiranë, Martin de la Beij.


Gjatë këtij takimi, Kryetari i Gjykatës së Lartë e ka falenderuar Ambasadorin holandez për vizitën dhe mbështetjen e vazhdueshme që Hollanda i ka dhënë Shqipërisë si shtet kandidat për integrimin evropian, si dhe bashkëpunimin e deritanishëm me anë të projekteve konkrete në ndihmë të gjyqsorit shqiptar.
Aktualisht, Gjykata e Lartë ka fituar projektin e financuar nga qeveria Hollandeze “Rritja e Efiçencës në Administrimin e Drejtësisë”. Kryetari i Gjykatës së Lartë u shpreh se ky projekt i shkëlqyer do të ofrojë ndihmë konkrete në trajtimin e çështjeve me interes për Gjykatën e Lartë, gjithnjë në funksion të forcimit e konsolidimit të mëtejshëm të pushtetit gjyqësor, në mënyrë që të përballohen me sukses sfidat për forcimin e demokracisë në Shqipëri, forcimin e shtetit të së drejtës, mbrojtjen e të drejtave dhe interesave të ligjshme të individit me anë të një drejtësie efektive në shërbim të qytetarit.
Në frymën e bashkëpunimit, Z. Zaganjori mirëpriti idenë e ambasadorit De la Beij për vazhdimin të kësaj marrëdhënie bashkëpunimi, mes dy Gjykatave të Larta të të dyja vendeve dhe Këshillit të Gjyqtarëve në Hagë.


Ambasadori holandez Z. Martin de la Beij, u shpreh se personalisht i vlerëson hapat e marra nga Shqipëria për plotësimin e standarteve që do t’a afrojnë atë më pranë Evropës, duke u angazhuar se qeveria hollandeze do të jetë përkrah vendit tonë me ndihma dhe asistenca konkrete në fushën e drejtësisë dhe gjyqësorit.

“Trajnimi që pritet të organizohet në fillim të tetorit në Hagë, është një tregues pozitiv se Hollanda është mike e Shqipërisë dhe është e interesuar që institucionet në Shqipëri të funksionojnë normalisht në forcimin e shtetit ligjor, luftën kundër korrupsionit, etj. duke plotësuar sa më pare kriteret për t’u bërë pjesë e Bashkimit Evropian”tha ai.


Më pas Ambasadori holandez Martin de la Beij dhe Kryetari i Gjykatës së Lartë Xhezair Zaganjori zhvilluan dhe bisedë me 23 punonjësit e Gjykatës së Lartë (kryesisht ndihmësa ligjorë), të cilët do të nisen për trajnim 10 ditor në Hagë në datat 6 – 16 tetor 2013.
Shtuar më 02/10/2013, ora 18:17
Shkruani komentin tuaj!
Të fundit nga kjo kategori