Gjykata jep vendimin për të akuzuarit e vrasjes së Indritit, Kusi: Mos gjykoni familjarisht
Tre të akuzuarit; Bujar Kusi, Ferdinant Bakalli, Luan Caka dhe Ali Sula, si të përfshirë për vrasjen e Indrit Çelajt, të riut që u vra për shkak të montimit të një kondicioneri, kanë kërkuar lirinë në Gjykatën e Apelit. Pavarësisht kësaj, kjo e fundit vendosi t’i lërë në burg.

Avokati Ilir Murati që mbron Bujar Kusin, babain e dy të kërkuarve për vrasje, ka thënë se ai është takuar me të birin, Griseldon pas ngjarjes, por policia ka sajuar një vepër penale duke e çuar në burg të atin, sepse nuk kemi asnjë veprim duke fshehur e penguar të vërtetën.

“Bujari mbahet në burg vetëm pse është babai i autorit të dyshuar. Nuk është e drejtë që babai të mbahet në burg, pse djali ka kryer vepër penale. Në orën kur ka ndodhur krimi, Bujar Kusi ishte duke kryer veprime bankare. Ndaj i kërkoj gjykatës që të mos vendosë në përgjegjësi penale familjare dhe për këtë arsye i kërkoj gjykatës të heqë këtë masë sigurie të vendosur haptazi në kundërshtim me ligjin”, tha avokati i mbrojtjes së Bujar Kusit.

Ndërkohë, avokati Edison Hasanpashaj, i cili mbron Ferdinant Bakallin; të dyshuar për moskallëzim dhe veprime që fshehin të vërtetën, tha se klienti i tij ka njoftuar me telefon në numrin 127 ambulancën sapo ka parë viktimën.

“Ndaj shtetasi Bakalli nuk ka kryer veprime që pengojnë zbulimin e të vërtetës, ndaj kërkojmë ndryshimin e masës së sigurisë”, tha Hasanpashaj. Ndërsa avokati Arben Gramozi, që mbron shtetasin Ali Sula tha se ka kundërshtuar vendimin e Shkallës së Parë, që ka vendosur masën “arrest me burg”.

Klienti im s’ka qene fare në kohën e kryerjes së veprës penale. Ai thjesht njeh të dyshuarit për ngjarjen. Kërkojmë lirimin e tij”, tha Gramozi. Prokurori i apelit u shpreh se kërkesat e avokatëve mbrojtës nuk janë të bazuara.

“Vendimi i Gjykatës së Tiranës është i bazuar në fakte e prova. Të tre të dyshuarit jo vetëm që nuk kanë kallëzuar krimin, por kanë kryer edhe veprime konkrete për fshehjen e të vërtetës. Me përjashtim të Luan Cakës, i cili ishte shok me viktimën dhe për të cilin heqim dorë nga ankimi, për të tjerët kërkojmë lënien në fuqi të vendimit Të Gjykatës Tiranë”, tha Prokurori i çështjes.

Pavarësisht kërkesave të tre të akuzuarve si të përfshirë në vrasjen Indrit Çelajt, Gjykata vendosi lënien në fuqi të vendimit të shkallës së parë, atë të “burgut pa afat”.

Shtuar më 06/09/2019, ora 13:44
Shkruani komentin tuaj!
Të fundit nga kjo kategori