Mbledhja e sotme e Komisionit të Ligjeve u përfshi nga debate të ashpra dhe fyerje mes deputetëve të mazhorancës dhe opozitës. Temë e diskutimit ishte drafti për kufijtë shtetërore dhe shkak për ndezjen e përplasjes u bë një pyetje e deputetit socialist Sajmir Tahiri që nuk arriti të marrë përgjigje.

Pas ngulmimit të deputetit socialist, Portali Albeu bën të ditur se kreu i komisionit Ilir Rusmali ka kërkuar ndërprerjen me 10 minuta të mbledhjes, duke i kërkuar medias që të dalë jashtë. Sapo kamerat po përgatiteshin të dilnin nga salla, deputeti Tahiri iu drejtua kreut të komisionit duke i thënë “pse e prish mbledhjen kot ? “. Me mikrofon të fikur Rusmali i është kundërpërgjigjur deputetit Tahiri duke e quajtur “ debil“.

Në atë moment situata është tensionuar ndërsa deputeti Tahiri i ka kthyer përgjigje duke i thënë Rusmalit duke i thënë “mos më…” dhe duke bërë shenjë me kokë. Pas pushimit 10 minutësh gjithçka i është kthyer normalitetit,e madje palët bashkuan edhe votat për miratimin konsensual të ligjit që po diskutohej./albeu.com/