Fuste drogë në burg, arrestohet gardiani në Fushë-Krujë
Policia ka vënë në pranga një gardian i cili akuzohet pasi fuste lëndë narkotike në qelitë e burgut të Fushë-Krujës.

28 vjeçari me iniciale B.M, mëngjesin e sotëm iu gjet një sasi prej 30.8 gramë lëndë narkotike Canabis Sattiva, lëndë narkotike të fshehur në trup.

Njoftimi:

Drejtoria e Shërbimit të Kontrollit të Brendshëm në Sistemin e Burgjeve, ka arrestuar sot në flagrancë një punonjës të policisë së rolit bazë të IEVP-së Fushë Krujë.

Sipas të dhënave zyrtare, gardiani me inicialet B.M., 28 vjeç, nga fshati Luz i Krujës fuste drogë në burg.

Rreth orës 07:30 gjatë kontrollit të ushtruar për të hyrë në regjimin e brendshëm këtij punonjësi iu gjetën e bllokuan një sasi prej 30.8 gramë lëndë narkotike Canabis Sattiva, lëndë narkotike të fshehur në trup.

Kapja në flagrancë e këtij punonjësi u bë nga SHKBB-ja në bashkëpunim me IEVP-në Fushë Krujë. Kontrolli i imtësishëm i këtij punonjësi dhe kapja në flagrancë u bë pas indicieve dhe informacioneve që disponoheshin që më parë nga Drejtoria e Shërbimit të Kontrollit të Brendshëm në Sistemin e Burgjeve se ky punonjës policie merrej me aktivitet të kundraligjshëm si futja e lëndëve narkotike në regjimin e brendshëm të IEVP-së Fushë Krujë.

Njëkohësisht gjatë kapjes në flagrancë të këtij punonjësi policie në bashkëpunim me Policisë Vendore Fushë Krujë u ushtrua kontroll në banesën e këtij punonjësi ku në banesën e tij në fshatin Luz të Krujës u gjetën dhe u sekuestruan edhe një sasi tjetër prej 17. 92 gramë lëndë narkotike Canabis Sativa.

Nga ana e SHKBB-së po vazhdon kryerja e veprimeve hetimore për përfshirjen e personave të tjerë të implikuar në këtë ngjarje.

Materialet procedurale në ngarkim të punonjësit të Policisë B.M, i kaluan Prokurorisë pranë Gjykatës së Shkallës së Parë Krujë, për veprat penale “Prodhimi dhe shitja e narkotikëve” dhe “Futja ose mbajtja e sendeve të ndaluara në institucionin e ekzekutimit të vendimeve me burgim”, të parashikuar nga nenet 283/1 dhe 324/a i Kodit Penal.

Shtuar më 09/02/2021, ora 18:59

Shkruani komentin tuaj!
Të fundit nga kjo kategori