Si u arrestua krybashkiaku i Bulqizës, Lefter Alla, akuzat që rëndojnë ndaj tij

Kryebashkiaku socialist i Bulqizës, Lefter Alla u arrestua dje (15 mars) me urdhër të SPAK.

Ai akuzohet për korrupsion dhe abuzim me tenderat publikë gjatë kohës që ka qenë në krye të bashkisë.
Burime për AlbEu.com bëjnë me dije se policia dhe BKH mësynë dje në shtëpinë e vëllait të Allës.

Nuk dihet se pse BKH ka kryer kontrolle në banesën e shtëpisë së Lefter Allës. Ndërkohë dyshohet se janë shoqëruar edhe disa zyrtarë të Bashkisë së Bulqizës, që kanë qenë anëtarë të komisioneve për tendera publikë.

Arrestimi i Allës vjen dy muaj para zhvillimit të zgjedhjeve vendore të 14 majit.
Mësohet se gjatë operacionit të policisë, në pranga janë vënë edhe zyrtarë të tjerë të Bashkisë Bulqizë, të cilët kanë qenë anëtarë të komisioneve për tenderat publikë.

Dyshohet se bashkia e Bulqizës ka firmosur dy tendera mbi 200 mijë euro për asflatime rrugësh. Dyshimet janë se komisioni i ofertave ka skualifikuar ofertat më të mira dhe ka favorizuar një tjetër që nuk i përmbushte kriteret.

Urdhër ndalimet janë firmosur nga Prokuroria e Posaçme. Mësohet se hetimet në ngarkim të tyre kanë zgjatur të paktën 6 muaj.

Kjo nuk është hera e parë që Alla përballet me institucionet e drejtësisë, pasi pak vite më parë PD e akuzoi për konsum kokainë në një lokal, ku shfaqi edhe një video si provë.

Por vetë Alla hodhi poshtë akuzat dhe tha se ajo është montazh. Ndërkohë nga përgjigjet e analizave të kryera pranë laboratorit të policisë shkencore rezultoi se nuk ishte konsumues i lëndëve narkotike./albeu.com/