Flet gruaja pasi burri i vdiq në minierë: Kam tre fëmijë të vegjël, nuk kam bukë në shtëpi!
3 shtetas janë gjetur të vdekur në minierë në Selihtë të Dibër.

3 viktimat janë gjetur në orët e para të mëngjesit të sotëm, dhe ishin shpallur të zhdukur nga familjet Hoxha, Cesku dhe Rushiti.

Gruaja e të ndjerit Ruzhdi Rushiti ka zbuluar se bashkëshorti kishte vetëm tre javë që kishte filluar punë në minierë. Me lot në sy, thotë se burri i saj ishte i vetmi që punonte në familje dhe tani nuk kanë me çfarë të ushqehen.

"Kam fëmijët e vegjël. Burri ka tre javë që ka punuar dhe si kishte marrë lekët. Jam jetime. Nuk kam bukë sonte në shtëpi. Ju kërkoj ndihmë që të më ndihmoni se kam tre fëmijët në shkollë. Pa punë jam. Jam 29-vjeçe. Fëmijët i kam 7, 8 dhe 9 vjeç.

Burri më parë mblidhte lule në mal tre muaj e verës. Në minierë punonte prej 3 javësh. Tani më la, nuk kam asnjë të ardhur asgjë. Nga shteti nuk kam asgjë. Kërkoj ndihmë prej bashkisë dhe kush të jetë, kam tre fëmijë të vegjël", tha ajo për Abc News.

Edhe motra e viktimës i bëri apel shtetit që të ndihmonte tre fëmijët e Rushitit. Miniera e vogël ishte në pronësi të inxhinerit Ismail Hoxha, i cili u gjet dhe vetë i pajetë brenda në minierë, ndërkohë që kushtet e sigurisë në punë kanë lënë shumë për të dëshiruar.

Pòlicia bëri me dije se u gjetën trupat e shtetasve: Ismail Hoxha, 64 vjeç, banues në Peshkopi, Fatos Çesku, 55 vjeç, banues në Bulqizë dhe Rushdi Rushiti, 33 vjeç, banues në Bulqizë.

Nga veprimet hetimore të kryera dyshohet se kanë humbur jetën si pasojë e asfiksisë nga gazrat e minierës ndërkohë që vijon puna për sqarimin e plotë të rrethanave të ngjarjes.
Shtuar më 29/10/2020, ora 19:14

Shkruani komentin tuaj!
Të fundit nga kjo kategori