Familja e 15-vjeçares së përdhunuar kërcënon me vetëgjyqësi pas vendimit të gjykatës
Pas dënimit me 4.8 vite burgLigor Bibës i cili është akuzuar për përdhunimin e një vajze 15 vjeç, ka reaguar familja e të abuzuarës.

"20 vite burg duhet të ishte dënuar" është shprehur babai i vajzës i cili thotë se me aq dënim nuk shlyhet asgjë..

Ligor Biba është shpallur fajtor për abuzimin seksual ndaj 15-vjeçares Xh. Biba, ngjarje e ndodhur në mars të vitit të kaluar në fshatin Velçan të Pogradecit.

Gjithçka mori rrjedhë tjetër pas lindjes së foshnjës dhe daljes së rezultateve të ADN-së, të cilat vërtetuan atësinë e 55- vjeçarit, shkruan Panorama.

Organi i akuzës kërkoi 8 vite burg për Ligor Bibën, i akuzuar për përdhunimin e vajzës së mitur, ndërsa gjykata vendosi ta dënojë atë me 7 vite burg.

Por, pasi për muaj të tërë gjatë qëndrimit në paraburgim Biba kishte mohuar autorësinë e ngjarjes, pas daljes së rezultateve të ADN-së ai pranoi fajësinë dhe për rrjedhojë përfitoi edhe uljen e dënimit në masën 1/3, çka do të thotë se 55-vjeçari do të vuajë vetëm 4 vite e 8 muaj heqje lirie.

Në sallën e gjyqit, Ligor Biba ka pranuar fajësinë, por duke theksuar se akti ka qenë me konsensusin e vajzës, ndërkohë që e gjitha kjo sipas tij ka ndodhur në momentin që ka qenë nën efektin e alkoolit.

“E pranoj fajësinë. Kam qenë në kasolle ditën kur vajza më ka ardhur në mëngjes. Isha i dehur dhe nuk kam bërë asgjë me dijeni. Marrëdhënia ka qenë me dëshirën e vajzës.

Nuk e kam përdhunuar. Nuk e dija që vajza kishte mbetur shtatzënë. Jam bërë pishman. Nuk mbaj mend sepse kam qenë i dehur. I kërkoj falje familjes së vajzës dhe familjes sime”, ka deklaruar Biba para gjykatës

Ngjarja e rëndë që tronditi opinioni publik jo vetëm në Pogradec, u zbulua tetorin e vitit të kaluar kur vajza 15-vjeçare u zbulua se ishte shtatzënë nga infermierja e fshatit.

Pas kësaj, e shoqëruar nga prindërit denoncoi në Polici se ishte abuzuar seksualisht nga fqinji i saj. Situata ishte edhe më e rëndë, pasi nxënësja e klasës së 9-të ishte në muajin e 8-të të shtatzënisë.

Ndërsa vetë ajo identifikoi fqinjin e saj si personin përgjegjës për këtë ngjarje, vetë Ligor Biba, por edhe familjarët e tij e përjashtuan mundësinë që ai të kishte kryer marrëdhënie seksuale me të miturën.

Pak muaj pas ardhjes në jetë të foshnjës, u kërkua kryerja e analizës së ADN-së, ndërkohë që rezultatet e kësaj të fundit vërtetuan atësinë e 55-vjeçarit e nga ana tjetër, edhe pretendimet e 15- vjeçares Xh. Biba.

Ngjarja e rëndë ndodhi në muajin mars të vitit të kaluar në fshatin Velçan në zonën e Pogradecit, por e mitura nuk ka guxuar të denoncojë menjëherë abuzimin për shkak të opinionit në fshat, ndërkohë që zbulimi u bë në muajin e 8-të të shtatzënisë nga infermierja e fshatit.

Sipas rrëfimit të vetë vajzës, ngjarja kishte ndodhur në banesën e së miturës gjatë kohës që ajo ndodhej e vetme në shtëpi, pasi prindërit kishin shkuar në një fshat tjetër për të ndjekur një ceremoni përkujtimore.

Ligor Biba, mik i familjes, kishte shkuar në banesën e së miturës dhe sapo kishte hyrë, duke përfituar nga fakti se e kishte kapur në befasi, kishte abuzuar me të. Xh. Biba madje deklaroi se ai mund të kishte qenë nën efektin e pijeve alkoolike kur e kishte kryer abuzimin. /albeu.com/
Shtuar më 01/06/2018, ora 08:44

Shkruani komentin tuaj!
Të fundit nga kjo kategori