Një nga kritikët e fortë të aleancave, qoftë të qeverisjes, ashtu edhe të opozitës, Nard Ndoka e cilëson dorëheqjen e kandidatit për President, Xhezair Zaganjori, si një akt qytetarie dhe ndërgjegjësimi politik. Duke folur për Portalin Albeu, Ndoka thotë se me këtë vendim, gjyqtari i Gjykatës Kushtetuese ka rritur shanset që palët të bashkohen për zgjedhjen e një Presidenti konsensual dhe të pranuar nga palët.

Megjithatë, ish ministri i Shëndetësisë dhe kreu i PDK-së, Ndoka edhe në këtë rast nuk kursen kritikat ndaj koalicionit ku bën pjesë. Sipas tij, Partia Socialiste në këtë rast duhet të ngrihet në lartësinë e duhur pasi përndryshe mazhoranca do t’i kthehet kandidaturave politike në atë që Ndoka e cilëson si një “lojë të rrezikshme”.

“Tërheqja e Zaganjorit ishte një akt qytetarie dhe ndërgjegjësimi politik. Tashmë janë rritur shanset për një kandidat konsensual e të pranuar nga palët. Megjithatë, Partia Socialiste duhet të tregohet në lartësinë e duhur pasi përndryshe do të ketë një kandidat nga mazhoranca, duke u rikthyer në kandidatura politike. Partia Socialiste në këto momente është e paqartë dhe konfuze në vendimet e saj, ndërsa mazhoranca po luan një lojë të rrezikshme për procesin dhe institucionin e Presidentit” thotë Ndoka. /albeu.com/