E PAPRECEDENT/ Ambasada ruse tallet keq me Bushatin dhe qeverinë shqiptare
Pëlqej
Ka qenë plot nota ironie deklarata e sotme e ambasadës së Federatës së Rusisë në Tiranë ndaj reagimit të dy ditëve më parë të Ministrisë së Punëve të Jashtme të Shqipërisë.

Në reagimin e saj publik, ambasada thekson me nota ironie se Rusia dhe Anglia nuk po gjejnë dot se çfarë ndodhi me ish-spiunin rus Sergei Skripal në Angli, por duke qenë se Shqipëria kishte deklaruar zyrtarisht se bëhej fjalë për një "sulm kimik rus", atëherë i fton zyrtarët tanë që të ndihmojnë me provat që kanë.

Kjo deklaratë është e rrallë e këtij lloji e një ambasade në Shqipëri duke pasqyruar njëkohësisht agresivitetin rus, por edhe paaftësinë e autoriteteve shqiptare për të qenë dinjitoz në qendrimet për çështje të ndryshme ndërkombëtare.

Deklarata e plotë
Kemi lexuar deklaratën e Ministrisë për Evropën dhe Punët e Jashtme të Shqipërisë, datë 20 mars 2018, titulli i së cilës konstaton një “sulm kimik të zhvilluar nga Rusia kundër Britanisë së Madhe”.

Kemi respekt për specialistët e MEPJ-së dhe nuk kemi asnjë arsye për të vënë në dyshim përgjegjshmërinë e tyre në formulimin e deklaratave zyrtare të dikasterit që përfaqësojnë. Prandaj kemi arsye të besojmë që kolegët tanë shqiptarë duhet të kenë prova të implikimit të Rusisë në helmimin e Sergej Skripal-it dhe vajzës së tij Julia.

Siç dihet, Britania e Madhe, e cila ka ngritur disa akuza të rënda kundër Rusisë lidhur me incidentin në Salisbury, vazhdon të refuzojë me kokëfortësi të tregojë prova dhe të zbatojë procedurat e aprovuara ndërkombëtare, përfshirë edhe në kuadër të Organizatës për Ndalimin e Armëve Kimike.

Kjo do të thotë me të gjitha gjasat që Londra nuk ka asnjë provë të përfshirjes ruse. Dhe në këtë situatë, kur i gjithë komuniteti ndërkombëtar dhe në veçanti Rusia kërkon me të drejtë një hetim sa më të shpejtë të tragjedisë, informacioni që zotëron pala shqiptare dhe në bazë të të cilit është përgatitur deklarata e lartpërmendur e MEPJ-së, është me rëndësi kritike për zbardhjen e situatës dhe identifikimin e autorëve të ngjarjes.


I qëndrojmë mendimit se fshehja e këtij informacioni është e palejueshme dhe në kundërshtim me interesin e përbashkët të të gjitha shteteve të përgjegjshme.

E ritheksojmë: ne nuk mund të besojmë që pala shqiptare mund të ketë hedhur gjithë fajin për atentatin në Salisbury mbi Rusinë pa patur argumente të forta e të mjaftueshme. Në të kundërt, do të bëhej fjalë qoftë për mungesën e kompetencës nga ana e MEPJ-së, qoftë për një manipulim të qëllimshëm të opinionit publik. Pala ruse, më shumë se çdokush tjetër, është e interesuar për të zbuluar të vërtetën e helmimit të shtetases ruse dhe është e hapur për çdo komunikim me kolegët shqiptarë lidhur me këtë çështje.
Shtuar më 22/03/2018, ora 14:08
Shkruani komentin tuaj!
Të fundit nga kjo kategori