Morgu i tejmbushur me kufoma nga COVID-19, reagon ashpër drejtori: Inskenim!
Mbrëmjen e sotme në media u publikuan me shpejtësi disa pamje nga morgu në Tiranë. Dhjetra viktima, të deklaruara nga COVID-19 gjendeshin në tokë, ndërkohë bëhej me dije se morgu ishte i tejmbushur nga viktimat.

Pas pamjeve skandaloze, ka reagur ashpër drejtori i Morgut Xhemali i cili shprehet se e gjutha është një inskenim.


"Është e dhimbshme deri në neveri, që autori i fotove është kujdesur të kryejë një shërbim të porositur për të nxitur panik dhe nxirë bluzat e bardha të institucionit."- shkruhet në njoftimin zyrtar.

Reagimi i plotë:

Në emër të institucionit dhe të stafit tonë, shpreh indinjatën për inskenimin e bërë me fotografitë që janë nxjerrë në media nga mjediset e morgut!

Periudha që po jetojmë në punën tonë, ashtu si për të gjitha institucionet e ngjashme në spitalet e mbarë botës ka qenë tejet e mbingarkuar.

Padyshim që morgu nuk bën asnjë përjashtim në pamundësinë për t'i sistemuar denjësisht të gjitha kufomat në mjediset frigoriferike në dispozicion, kur ka më shumë fatalitete.

Kur jemi në pamundësi, ato sistemohen në tavolina, më pas në barela dhe kur ndodh që të jenë më shumë, vendosen me respektin më të madh në dysheme bashkë me sendet vetjake të paketuara, pasi kryhen proceset përkatëse në pritje që t'u dorëzohen familjarëve.

Por kurrsesi nuk është rrëmuja e paraqitur në fotot keqdashëse të shpërndara në media. Sendet personale që shoqërojnë trupat, janë veshjet e të ndjerëve, të cilat përbëjnë kujtime të çmuara për familjarët.

Edhe logjika më elementare të thotë se ky është thjesht dhe vetëm një inskenim! Është e dhimbshme deri në neveri, që autori i fotove është kujdesur të kryejë një shërbim të porositur për të nxitur panik dhe nxirë bluzat e bardha të institucionit.

Ne kemi njoftuar institucionet eprore për këtë operacion keqdashës dhe kriminal në raport me publikun dhe shpresojmë që fajtori të identifikohet e të vihet para drejtësisë.


Drejtori

Bledar Xhemali
Shtuar më 20/11/2020, ora 22:42

Shkruani komentin tuaj!
Të fundit nga kjo kategori