Zgjedhjet e 14 majit/ Tërhiqen nga gara kandidati i Alibeajt për kryetar bashkie në Korçë dhe të gjithë kandidatët për Këshillin Bashkiak

Kandidati i PD-së për Kryetar të Bashkisë Korçë Gjergji Gjata dhe 40 kandidatë për Këshillin Bashkiak janë tërhequr nga gara elektorale për Zgjedhjet Vendore 2023.

Vendim është marrë, pasi sipas tyre ka mungesë të procedurave vendimmarrëse në organet drejtuese të PDSh lidhur me kandidimet, si dhe për shkelje të integritetit dhe dinjitetit të të gjithë kandidatëve, cenuar nga vendime personale dhe jo kolegjiale.

“Ju informojmë se unë si kandidati për Kryetar i Bashkisë Korçë dhe 40 kandidatë për Këshillin Bashkiak, të partisë politike PDSh, tërhiqemi nga gara elektorale (në mënyrë të parevokueshme) për Zgjedhjet Vendore 2023, për mungesë të procedurave vendimmarrëse në organet drejtuese të PDSh lidhur me kandidimet, si dhe për shkelje të integritetit dhe dinjitetit të të gjithë kandidatëve, cenuar nga vendime personale dhe jo kolegjiale. Urojmë më të mirën për Korçën dhe suksese për kandidatët më të mirë në të gjithë vendin. Procedurën zyrtare do e kryejmë sipas rregullave që parashikon ligji, pranë KQZ”, është  shprehur Gjata në një deklaratë në rrjete sociale.

Partia Demokratike e Enkelejd Alibeajt është ende e paqartë se në sa bashki do të kandidojë për zgjedhjet vendore të 14 majit.
Përmes një konference për mediet, Alibeaj shprehet se PD-ja ndodhet në një situatë kaotike dhe përgjegjës për këtë është Sali Berisha me Edi Ramën.

Sipas kryedemokratit, zaptimi i “Kështjellës” së PD-së në qendër dhe selive në rrethe nga Sali Berisha, pati efektin e vet në mbarëvajtjen e procesit organizacional për zgjedhjet. Sakaq, Edi Rama – sipas tij – është fajtor sepse zvarriti procesin gjyqësor për vulën e PD-së.

Nëpërmjet një konference për mediet, Alibeaj tha se PD-ja ndodhet në një situatë kaotike dhe përgjegjës për këtë është Sali Berisha me Edi Rama.