E BUJSHME/ Probleme me pasurinë, kërkohet shkarkimi i Donika Prelës
Komisioneri Publik ka ankimuar pranë Komisionit të Pavarur të Apelimit vendimin e KPK-së që linte në detyrë Kryeprokuroren e Krimeve të Rënda, Donika Prela.

Dy javë më parë, KPK kishte parë të arsyeshme që Prela të vijonte detyrën edhe pse në pasurinë e saj kishte mos justifikim të ardhurash, por duket se kjo është kapur nga Komisioneri Publik, i cili tashmë kërkon largimin e Prelës, me të njëjtin argument që janë shkarkuar edhe emra të njohur të sistemit të drejtësisë në vend, siç është Bashkim Dedja.

Prela nuk mundi të faktojë rrogën e deklaruar të bashkëshortit për disa vite me radhë duke bërë kështu që ajo të mos përllogaritej si e ardhur e ligjshme. Në këtë mënyrë, një pjesë e shpenzimeve të Prelës mbetën të pajustifikuara duke qenë se të ardhurat e bashkëshortit cilësohen të paligjshme.

Me të njëjtin argument i shkarkua nga KPA edhe kreu i Gjykatës Kushtetuese, Bashkim Dedja, raporton Albeu.com.

Për Komisionerin Publik Drejtuesja e Prokurorisë së Krimeve të Rënda nuk duhet të ishte konfirmuar në detyrë nga Komisioni i Pavarur i Kualifikimit duke kërkuar shkarkimin nga detyra tek Kolegji i Posaçëm i Apelimit.

Komisioneri Publik, brenda afatit ligjor, ushtroi ankim në Kolegjin e Posaçëm të Apelimit, pranë Gjykatës Kushtetuese, kundër vendimit nr. 103, datë 5.2.2019, të Komisionit të Pavarur të Kualifikimit, për subjektin e rivlerësimit znj. Donika Prela, magjistrate/prokurore, drejtuese në Prokurorinë pranë Gjykatës së Shkallës së Parë për Krime të Rënda.

Komisioneri Publik, pasi shqyrtoi vendimin e mësipërm të Komisionit të Pavarur të Kualifikimit, vlerëson se bazuar në provat dhe faktet e administruara nga Komisioni i Pavarur i Kualifikimit, subjekti i rivlerësimit, znj. Donika Prela, nuk plotëson kushtet për konfirmimin në detyrë.

Nëpërmjet këtij ankimi, Komisioneri Publik kërkon nga Kolegji i Posaçëm i Apelimit të marrë në shqyrtim çështjen në seancë publike dhe, në përfundim të gjykimit, të ndryshojë vendimin nr. 103, datë 5.2.2019, të Komisionit të Pavarur të Kualifikimit, duke vendosur shkarkimin nga detyra të subjektit të rivlerësimit, znj. Donika Prela.

Institucioni i Komisionerëve Publikë është ngritur dhe funksionon në bazë të nenit 179/b dhe aneksit të Kushtetutës së Republikës së Shqipërisë, dhe ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”.
Shtuar më 10/04/2019, ora 16:49
Shkruani komentin tuaj!
Të fundit nga kjo kategori