Duan të ndërtojnë resorte? Zbulohet arsyeja e zjarreve të vazhdueshme në vend
Kreu i Emergjencave Civile, Haki Çako, shprehet se në zonat ku kanë rënë zjarre fshihen interesa personale të bizneseve, për t’i kthyer këto toka në resorte turistike.

Në një lidhje telefonike me Report Tv, Çako i bëri apel policisë që të intensifikojnë punën për identifikimin e autorëve.

“Kemi informacione dhe i bëjmë thirrje policisë së Shtetit të intensifikojnë punën e tyre për të identifikuar personat apo subjekte që kanë qëllim të bëjnë resorte në këto zona”, tha ai.

Çako sqaroi se zjarret kanë rënë në sipërfaqe me shkurre dhe fatmirësisht nuk ka pasur zona të mbrojtura apo parqe kombëtare që janë djegur.

“E kanë në kontroll deri diku, por herë pas herë merr përmasa te shkurret masive të thara. Iu bëj thirrje qytetarëve, subjekteve, të rrisin vëmendjen dhe të angazhohen për t’u bërë pjesë jo vetëm vullnetarisht për të parandaluar zjarrin, se është një fatkeqësi dhe prevalon për shkak të pakujdesisë apo iniciativave kriminale.

Zjarri është një fenomen natyror, në bazë të ligjit u bëj thirrje kryetarëve të Bashkive të rrisin kapacitete e tyre dhe të investojnë për të përmirësuar flotën dhe nivelin e reagimit të parandalimit të zjarreve, se shpesh kujtohen në pikën e verës apo kur kanë rënë zjarre.

Nuk ka zona të mbrojtura apo parqe kombëtare që janë përfshirë nga zjarri”, shtoi ai.
Shtuar më 04/08/2020, ora 18:01

Shkruani komentin tuaj!
Të fundit nga kjo kategori