Daja i 16 vjeçares paralajmëron vetëgjygjësi: Policia të gjejë autorin
Të afërmit e 16-vjeçares Enkelejda Mëhilli, e cila u gjet e masakruar në një kanal pranë banesës së saj kërkojnë nga policia kapjen e autorëve që kanë kryer këtë akt në të kundërt paralajmërojnë vetëgjygjësi.


Në një intervistë për Panoramën daja i viktimës, Pashk Vogli, shprehet se familja nuk gjen qetësi, nëse nuk shikojnë prapa hekurave personin që i mori jetën vajzës vetëm 16 vjeçe. Sipas tij, familja nuk kishte asnjë konflikt me persona të tjerë dhe se vajza priste të fejohej në këto ditë.

Intervista
Pashk, mbesa juaj u gjet e pajetë në një kanal e përplasur nga makina. A keni dijeni si ka ndodhur ngjarja?

Daja i 16-vjeçares, Pashk Vogli
Ça të them?! Jemi shumë të pikëlluar nga vdekja e parakohshme e vajzës, e cila u nda nga jeta në lulen e rinisë. Kjo ngjarje na ka tronditur shumë. Vajza ishte në punë si gjithnjë, por nuk erdhi në darkë në shtëpi, sikurse bënte zakonisht. Punëtorët i sjell çdo ditë furgoni i firmës deri afër shtëpisë. Siç thotë shoferi i furgonit, edhe mbrëmjen e së mërkurës këtë gjë ka bërë. Vajza ka zbritur nga furgoni dhe, në momentin që do të kapërcente rrugën për të hyrë në shtëpi, është përplasur për vdekje. Ishte kohë shumë e keqe, shi dhe furtunë, plus errësirë, pasi siç e shikoni, kjo është rrugë fshati.

Babai i saj e gjeti mëngjesin e së enjtes. Kërkuat për Enkelejdën gjatë mbrëmjes?
Patjetër, gjithë natën kemi kërkuar. Sapo vumë re se vajza nuk po vinte në shtëpi, nisëm të shqetësoheshim. Filluam të pyesnim gjithkënd që mund të kishte dijeni. Motra e saj ishte ndarë më herët prej saj dhe nuk e kishte parë më. Orët kalonin dhe ankthi në familje shtohej. I binim telefonit, por dilte i fikur. Pastaj në mëngjes babai i saj e gjeti të vdekur këtu te kanali përpara shtëpisë, në mes të ferrave.

Policia e ka konsideruar si ngjarje aksidentale. Ju si familje keni dyshime?
Në fakt, vendi i ngjarjes të jep këtë përshtypje dhe nuk lë shumë dyshime mbrapa. Jemi të sigurt që vajza ka gjetur vdekjen si pasojë e përplasjes nga ndonjë automjet. Kishte shenja dhe copa pasqyrash në shpinë, të cilat i ka marrë gjatë përplasjes.

A i gjetët sendet personale që kishte Enkelejda me vete?
Po, nuk i mungonte asnjë gjë. Të gjitha i gjetëm aty. Nuk ka pasur asnjë grabitje. Prandaj edhe ne dyshojmë se kemi të bëjmë me një aksident. Por, edhe pse është aksident, fajtori duhet të shkojë pas hekurave dhe të vuajë dënimin për dëmin e madh që i shkaktoi familjes sonë.

Prej sa kohësh punonte Enkelejda në fabrikën e këpucëve?
Ka rreth një vit, a ndoshta pak më shumë. Shkollën e mesme nuk mundi ta vazhdonte, pasi familja nuk është në gjendje të mirë ekonomike dhe kishte nevojë për të ardhura. Ajo nuk zgjodhi shkollën siç bënë të gjithë moshatarët e saj, por preferoi të punonte për të ndihmuar familjen. Po në atë fabrikë punon edhe motra e saj pak më e madhe, Jolanda. Atë ditë Jolanda kishte ardhur pak më herët.

Si sillej Enkelejda kohët e fundit, a ishte e shqetësuar dhe a kishte probleme me njeri?
Asnjë shqetësim nuk ka shfaqur vajza. Ishte si çdo ditë e qeshur. Shkonte në punë dhe vinte normalisht. Vajza ishte gati në prag fejese. Ishte njohur me një djalë të zonës dhe priste që këto ditë të shpallte fejesën. As me shoqet e punës nuk ka pasur asnjë problem, këtë e thotë edhe motra e saj më e madhe, e cila punon në të njëjtën fabrikë.

Çfarë kërkoni nga policia?
Si familjarë kërkojmë nga policia atë që do të kërkonte çdokush që do të ishte në vendin tonë. Kërkojmë që të identifikohet personi që i mori jetën vajzës sonë dhe të vihet pas hekurave. Nëse nga ana e policisë nuk merren masa për ndëshkimin e autorit, i cili aksidentoi për vdekje mbesën time, paralajmërojmë se do të bëjmë vetëgjyqësi. Familja, madje i gjithë fisi, nuk mund të pranojë që një ngjarje e tillë, ku humbi jetën si pasojë e një aksidenti Enkelejda, të mbetet pa ndëshkuar. Policia të hidhet në sulm për të gjetur autorin, sepse nëse ndodh që do ta gjejmë ne më parë se policia, atëherë do ta vrasim me duart tona autorin e kësaj ngjarjeje të rëndë.
Shtuar më 23/11/2013, ora 13:49

Shkruani komentin tuaj!
Të fundit nga kjo kategori