Çfarë ndodhi në protestën e së shtunës (FOTO LAJM)

Protesta e gjashtë kombëtare e thirrur nga opozita për largimin e qeverisë ishte paqësore. Thirrjet e forta të ndërkombëtarëve për të shmangur dhunën, por mbi të gjitha sinjalizimet e partnerëve se janë gati të negociojnë një zgjidhje për krizën politike kishin ndryshuar tërësisht mënyrën e zhvillimit të tubimit.

Kapsollat e zhurmshme dhe tymueset që kishin ngjyrosur sheshin përpara Kryeministrisë 3 muajt e fundit, dje u kishin lënë vendin simbolikave të forta për largimin e qeverisë. Me qindra flamuj të Shteteve të Bashkuara dhe Bashkimit Europian ishin tregues se opozita zgjidhjen tashmë e pret nga faktori ndërkombëtar, një ndërmjetësim, që ka deklaruar se mirëpret edhe Lulzim Basha.
BAsha-dritat


Për të bërë më të fortë mesazhin e tyre drejtuar ndërkombëtarëve në krah të podiumit, ku foli kryetari i opozitës, u shpalosën dy flamuj gjigandë të SHBA-ve dhe BE-së. Sipas demokratëve, qëllimi ka qenë të tregohet se shqiptarët janë të bashkuar, përtej bindjeve politike, me kauzën e opozitës për zgjedhje të lira e të ndershme për të vendosur ata me votë të lirë qeverinë dhe jo krimi dhe për të hapur dyert e mbyllura prej 6 vjetësh.

Zhurmën e mjeteve piroteknike, protestuesit e kishin zëvendësuar me vuvuzelë që shoqëruan të gjithë 180 minutat e zhvillimit të protestës. Në rreshtin e parë në krah të efektivëve të Policisë së Shtetit, njësoj si në çdo protestë paqësore të organizuar nga opozita, u rreshtuan mbi 100 të rinj të Forumit Rinor të Partisë Demokratike që mbanin në krah shirita të bardhë. Ishin pikërisht këta të rinj që këshillonin të gjithë protestuesit të mos kryenin akte dhune dhe të mos qëllonin në drejtim të forcave të Policisë, e cila ishte pajisur edhe me maskat kundër gazit lotsjellës.

SIMBOLIKAT

Kur të gjithë protestuesit prisnin afrimin e kreut të PDsë, organizatorët nxorën në skenë elementin tjetër simbolik, me të cilin kishin zgjedhur të protestonin. Dhjetëra tepsi që simbolizonin pushtetin që Kryeministri Rama kërkoi gjatë fushatës së vitit 2017 u ngritën nga protestuesit. Në çdo tepsi ishte shkruar “Rama Ik” ose ishte stampuar një foto e vjetër e kreut të qeverisë gjatë kohës që ishte emigrant në Francë. Krahas thirrjeve për largimin e Kryeministrit, protestuesit bënë të qartë se nuk do të ketë zgjedhje pa opozitën.

Për të treguar se simbolika ishte synimi kryesor i protestës së gjatë të opozitës, gjatë fjalës së kreut të PD-së, Lulzim Basha, protestuesit ngritën në qiell 500 balona me flakë, në të cilat ishte e stampuar shprehja “Rama ik”.

Për më shumë se 20 minuta, qielli përpara Kryeministrisë u skuq nga thirrjet e hedhura në qiell nga protestuesit e opozitës. Një projektor gjigand e ktheu murin e Kryeministrisë sërish në një ekran për të sulmuar qeverinë. Demokratët akuzuan përmes fotove lidhjet e qeverisë me krimin dhe vjedhjen e zgjedhjeve. Zhvendosja Pasi ishte i bindur se mesazhi i tij politik dhe qytetar drejt Kryeministrit Rama ishte dhënë, Basha i ftoi qytetarët të ndiznin dritat e telefonave dhe përmes një marshimi t’i drejtoheshin selisë së Parlamentit. Me thirrjet “E duam Shqipërinë si gjithë Europa” dhe “Rama ik”, protestuesit u zhvendosën nga bulevardi “Dëshmorët e Kombit” në drejtim të Rrugës së Elbasanit për t’u pozicionuar përpara selisë së Parlamentit.

Njësoj si në protestat e mëparshme, protestuesit rrëzuan kordonin e hekurt dhe tentuan të thyejnë kordonin e Policisë. Ky ishte i vetmi moment, ku punonjësi i Policisë së Shtetit i bëri thirrje Sekretarit të Përgjithshëm të PD-së, Gazment Bardhi, në cilësinë e organizatorit të protestës të tërhiqte protestuesit e dhunshëm. Por pas këtyre përplasjeve të vogla, ishte vetë kreu i PD-së, që ftoi qytetarët në selinë blu për të përmbyllur protestën e gjashtë kombëtare.

Protesta e ndjekur hap pas hapi:

Ora 21:10 Ashtu sikurse herë të tjera, edhe në protestën e sotme të opozitës, situata para Parlamentit po përkeqësohet.

Dy vatra të vogla zjarri kanë shpërthyer aty nga ndezja e pankartave, ndërsa disa protestues kanë hedhur sende të forta në drejtim të forcave të rendit.

Sekretari i Përgjithshëm i Partisë Demokratike, Gazmend Bardhi ka ndërhyrë duke kërkuar nga protestuesit që të mos hedhin gurë drejt policëve.

-Incidentet-para-parlamentit-Incidentet-para-parlamentit1-Incidentet-para-parlamentit-Bardhi



Ora 20 : 31 Kryetari i opozitës, Lulzim Basha i ka ftuar qytetarët që t’i bashkohen në protestën-marshim drejt Parlamentit.

Ai ka kërkuar nga protestuesit të mbajnë të ndezura dritat e celularëve dhe ta ndjekin tek ai që demokratët e quajnë “Parlamenti i krimit”.


Basha-dritat

Ora 20:20 Protestuesit e opozitës ndryshe nga herët e tjera gjatë protestës së sotme janë treguar paqësorë.

Ata kanë hedhur drejt godinës së Kryeministrisë vetëm bojë dhe disa kapsolla.

Ndërkohë që organizatorët e protestës janë kujdesur për të shmangur konfrontimet me policinë.

Në mënyrë simbolike gjatë kohës që Lulzim Basha mbajti fjalimin e tij, protestuesit kanë hapur një flamur të madh të bashkuar, të Shqipërisë dhe BE-së.

“Janë dy flamuj të mëdhenj te hapur ne proteste. Flamuri kombëtar dhe ai i BE. Mesazhi është se shqiptaret janë te bashkuar, përtej bindjeve politike, me kauzën e opozitës për zgjedhje te lira e te ndershme, për te vendosur ata me vote te lire qeverinë dhe jo krimi, për te hapur dyert e mbyllura prej 6 vjetësh”, thekson PD.


Ora 19:45 Kryetari i opozitës, Lulzim Basha dhe kryetarja e LSI-së, Monika Kryemadhi janë nisur drejt “Bulevardi Dëshmorët” e kombit për t’iu bashkuar mijëra protestuesve të mbledhur në shesh.

Basha është shoqëruar me një grup të rinjsh, vajza e djem të forumit rinor demokrat. Ndërkohë që Kryemadhi shoqërohet nga drejtuesit dhe simpatizantët e LSI-së.

Minibalona me mbishkrimin “Ik”, po lëshohen përpara ndërtesës së Kryeministrisë. Janë rreth 500 mini-balona të tilla që do të lëshohen në ajër.

Ora 19:08 –Nisi grumbullimi i protestuesve përpara ndërtesës së Kryeministrisë. Protestës pritet t’i bashkohet edhe lideri i Partisë Demokratike, Lulzim Basha.

Rreth 1700 forca policie janë vendosur në terren për të garantuar sigurinë.

Ora 18:50 – Përpara godinës së Kryeministrisë ka nisur grumbullimi i protestuesve të opozitës. Sot pritet të zhvillohet protesta e gjashtë kombëtare.

Siç i shihni në këto foto, protestuesit mbajnë pankarta si “Rama ik” apo “S’ka zgjedhje pa opozitën”, vuvuzela apo daulle.

Dhjetëra mijëra persona janë nisur nga rrethet për t’u grumbulluar në bulevardin “Dëshmorët e Kombit”. /Panorama/

Shtuar më 26/05/2019, ora 09:26
Shkruani komentin tuaj!
Të fundit nga kjo kategori