Cërvenkovski me Serbinë, Buçkovski me Kosovën
Albeu.com
Qëndrimi zyrtar i Maqedonisë lidhur me statusin e Kosovës është qëndrimi i presidentit Branko Cërvenkovski. Ky është reagimi i shkurtër i kabinetit të presidentit të Maqedonisë, lidhur me parashikimin e kryeministrit Vllado Buçkovski se Kosova deri në fund të këtij viti do të fitojë pavarësi.Kreu i Maqedonisë i ndarë. Presidenti Cërvenkovski javën e ardhshme do të udhëtojë për në Beograd, ndërsa kryeministri Buçkovski shumë shpejt do të zhvillojë një takim me Çekun.

Në kabinetin e Cërvenkovskit refuzojnë ta komentojnë deklaratën e Buçkovskit. Atje vetëm përsërisin se presidenti edhe më tej mbetet në qëndrimin se për Maqedoninë është e pranueshme çdo zgjidhje e cila do të arrihet mes Prishtinës dhe Beogradit me ndërmjetësim të bashkësisë ndërkombëtare.
“Qëndrimi i presidentit lidhur me zgjidhjen e çështjes së Kosovës, është qëndrimi i njëjtë të cilin e prezantoi para Parlamentit në fund të vitit të kaluar. Në këtë paraqitje presidenti theksoi se ky qëndrim është edhe qëndrim zyrtar i shtetit”, thonë në kabinetin e Cërvenkovskit.
Presidenti Cërvenkovski javën e ardhshme do të udhëtojë për në Beograd, ku do të takohet me kreun shtetëror të Serbisë dhe unionit Serbi - Mali i Zi. Çështja e Kosovës do të jetë temë e pashmangshme në bisedimet që do t’i zhvillojë Cërvenkovski.
Edhe në këto takime Cërvenkovski do ta përsërisë qëndrimin e tij lidhur me Kosovën, me çka pritet që në njëfarë mase ta ulë nervozizmin e Beogradit zyrtar, ku deklarata e Buçkovskit u vlerësua si “e pamatur”.
Cërvenkovski do të realizojë vizitë zyrtare në Beograd edhe përkundër faktit se kryeministri serb Voisllav Koshtunica tani tetë muaj refuzon të realizojë vizitën e paralajmëruar zyrtare në Shkup.
Kryeministri Buçkovski në një deklaratë të tij, prolongimin e vizitës së Koshtunicës e ka vënë në korelacion me aferën “Vranishkovski” dhe ka shtuar se ky prolongim “nuk flet mirë” për marrëdhëniet mes Shkupit dhe Beogradit.
Kjo është edhe një përplasje mes presidentit dhe kryeministrit të Maqedonisë në temën e Kosovës.
Buçkovski vitin e kaluar haptazi pat kundërshtuar kërkesën e Cërvenkovskit që Maqedoni të vendosë viza për qytetarët e Kosovës, pas paralajmërimeve se UNMIK-u do të vendosë viza për qytetarët e Maqedonisë. Njëkohësisht shumë shpejt pritet Buçkovski të zhvillojë një takim me homologun e tij kosovar, Agim Çekun.
nga ISEN SALIU, Lajm
Shtuar më 29/03/2006, ora 15:57
Tage: arkiv

Shkruani komentin tuaj!
Të fundit nga kjo kategori