Çeku midis Ahmetit dhe Xhaferit
Albeu.com
Ahmeti thuhet t’i ketë sugjeruar Çekut që të fillojë bisedimet me krerët e Maqedonisë dhe të nënshkruajë marrëveshje për definimin e vijës kufitare, derisa Xhaferi e ka këshilluar që të pritet statusi përfundimtar.Kryeministri kosovar Agim Çeku është duke zhvilluar konsultime me liderët politikë të shqiptarëve në Maqedoni rreth përshkrimit të vijës kufitare. Në prag të vizitës në Shkup, Çeku mësohet të ketë marrë këshilla të ndryshme nga kreu i Bashkimit Demokratik për Integrim (BDI), Ali Ahmeti dhe kreu i Partisë Demokratike Shqiptare (PDSH), Arbën Xhaferi. Me të parin është dëgjuar në telefon, derisa me të dytin është takuar në Prishtinë.
Ahmeti thuhet t’i ketë sugjeruar Çekut që të fillojë bisedimet me krerët e Maqedonisë dhe të nënshkruajë marrëveshje për definimin e vijës kufitare, duke mos saktësuar nëse kjo të bëhet para apo pas statusit përfundimtar të Kosovës. “Me rëndësi është që të ketë një Marrëveshje mes Prishtinës dhe Shkupit, dhe më pas bëhet demarkacioni i vijës kufitare. Nuk do të ketë demarkacion pa marrëveshje me Kosovën”, ishte i prerë ai.
Xhaferi, ndërkaq, ka këshilluar kreun e Qeverisë kosovare që të pritet statusi përfundimtar që më pas, në pozicione të barabarta, të bisedohet me Shkupin për çështjen e kufirit.
Nënkryetari i PDSH-së, Iljaz Halimi, konfirmoi se Xhaferi është në kontakt me kryeministrin kosovar. “Kryetari vazhdimisht është në kontakte me personalitete të larta të politikës shqiptare. Ato janë kontakte permanente”, tha Halimi për “Lajm”.
Sipas tij, nuk duhet të shpejtohet çështja e demarkacionit të kufirit. “Duhet së pari të përfundojnë bisedimet dhe të definohet statusi i Kosovës me qëllim që autoritetet kosovare të kenë kompetenca më të mëdha për ta zgjidhur çështjen në bisedime me palën maqedonase”, tha Halimi.
Bëhet e ditur se krerët e PDSH-së javën e ardhshme do të udhëtojnë në Prishtinë për të takuar kryeministrin Çeku dhe kryeparlamentarin Kolë Berisha. Mes tjerash, pritet të hapet edhe çështja e kufirit.
Edhe kryetari i Partisë Socialiste (PS) të Shqipërisë, Edi Rama, i sugjeroi kryeministrit Buçkovski të presë statusin përfundimtar të Kosovës. “Sipas nesh, është një çështje që do të duhet ta diskutojnë kosovarët pasi të pavarësohen. Duhet të jenë ata dhe vetëm ata që do të vendosin për këtë çështje në dialog dhe sovran për fatin e tyre”, tha të enjten Rama në kuadër të vizitës së tij në Shkup, ku mori pjesë në 15vjetorin e LSDM-së qeveritare.
Ndërkohë që këshilltari për politikës së jashtme i kryeministrit të Maqedonisë, Mersel Bilalli, ka qëndruar të enjten në Prishtinë për të prezantuar propozimin e Shkupit për zgjidhjen e kontestit kufitar.
Propozohet që së pari të nënshkruhet marrëveshje e përkohshme, e cila nuk do të ketë karakter juridik, me qëllim që të hapet rruga e përshkrimit të vijës kufitare. Kjo marrëveshje nuk do të ratifikohet nga institucionet përkatëse të Maqedonisë dhe Kosovës derisa të zgjidhet statusi dhe se do të pritet pavarësimi i Kosovës.
Karakteri i përkohshëm i marrëveshjes arsyetohet me faktin se derisa Kosova nuk fiton pavarësinë, nuk do të mund që të ratifikojë atë sepse nuk do të njihej ndërkombëtarisht. Kjo vjen nga shkaku se nuk mund të suspendohet Marrëveshja e 2001-shit, e nënshkruar me Beogradin, e cila është verifikuar në OKB.
Lidhur me 2500 hektarë tokë që mbeti në anën e Maqedonisë, propozimi i Qeverisë së Maqedonisë parasheh një kompensim apo blerje në mënyrë individuale nga pronarët kosovarë. Kjo është kundërshtuar ashpër nga banorët kosovarë që posedojnë tokën e sekuestruar.
Vizita e Çekut në Shkup, e paralajmëruar të realizohet në fund të muajit, shihet si vendimtare për zgjidhjen e çështjes së kufirit.
Autoritetet maqedonase shpresojnë se në këtë drejtim do të vendosë faktori ndërkombëtar, i cili sugjeron demarkacion para statusit.


Cërvenkovski: Vendos Washingtoni dhe Brukseli
Shkup - Presidenti i Maqedonisë, Branko Cërvenkovski, ka deklaruar se për përshkrimin e vijës kufitare me Kosovën vendos bashkësia ndërkombëtare, më saktësisht Brukseli dhe Washingtoni. “Faktor i vetëm respektabil për këtë çyshtje janë ndërkombëtarët. Gëzon fakti se demarkacioni duhet të bëhet para definimit të statusit përfundimtar të Kosovës”, tha Cërvenkovski.
nga XHELAL NEZIRI, Lajm
Shtuar më 21/04/2006, ora 20:45
Tage: arkiv
Shkruani komentin tuaj!
Të fundit nga kjo kategori