Ministria e Financave ka publikuar së fundmi treguesit e Borxhit Publik për gjashtëmujorin e këtij viti, në të cilat pasqyrohet një rritje nominale krahasuar me fundin e vitit të shkuar.

Në fund të vitit të shkuar, Borxhi Publik i Shqipërisë ishte rreth 772.8 miliardë lekë ose rreth 28.4 miliardë lekë më i vogël krahasuar me treguesit e fundit të qershorit 2012, sipas së cilës borxhi ka arritur në 801.2 miliardë lekë, shkruan Gazeta Shekulli.

Kjo është edhe diferenca e shkaktuar nga rritja nominale e Borxhit Publik gjatë periudhës janar-qershor për shkak të huamarrjes së jashtme dhe të brendshme të qeverisë për të financuar projekte të ndryshme por edhe për të financuar deficitin buxhetor.

Nëse do të përpiqemi që këtë borxh ta shpërndajmë për çdo shqiptar, përllogaritet që secili të ketë detyrimin për të shlyer një shumë prej rreth 2 700 dollarë.

Por si ka vijuar ecuria e borxhit për individë krahasuar me fundin e vitit të shkuar? Për gjashtë muaj me radhë, për shkak të huave të marra nga qeveria, Borxhi Publik u rrit në vlerë nominale me rreth 28.4 miliardë lekë ose rreth 260 milionë dollarë. E përpjesëtuar me numrin total të popullsisë, përllogaritet që vetëm gjatë gjashtë muajve të parë të këtij viti, stoku i borxhit për secilin shqiptar të jetë rritur me 10 mijë lekë krahasuar me atë të trashëguar nga vitet e mëparshme.

Por, pavarësisht rritjes nominale në gjashtë muaj, Ministria e Financave deklaron se Borxhi Publik mbetet nën limitin 60 për qind të Prodhimit të Brendshëm Bruto duke qëndruar në 58.8 për qind. /albeu.com/