Përdori gjuhën shqipe gjatë takimit me ministrin spanjoll, opozita maqedonase kërkon dorëheqjen e Bujar Osmanit

VMRO DPMNE dhe Ministria e Punëve të Jashtme u përplasën për përdorimin e gjuhëve. Partia opozitare i bëri thirrje Bujar Osmanit që të japë dorëheqje, pasi në takimin e fundit me kolegun spanjoll, e ka përdorur vetëm gjuhën shqipe. VMRO-DPMNE kërkon edhe përgjegjësi penale për Osmanin, pasi siç shtojnë, e ka dëmtuar reputacionin e shtetit.

“Nga takimi zyrtar i Osmanit me Ministrin e Punëve të Jashtme të Spanjës përmes konferencës për media, shihet qartë se Osmani përdor vetëm gjuhën shqipe, edhe pse është e qartë se cila është gjuha zyrtare e Maqedonisë për përdorim ndërkombëtar e përcaktuar me Kushtetutë. Kjo sjellje është shkelje e Kushtetutës së vendit, por edhe e vetë Marrëveshjes kornizë”, deklaroi Maria Miteva – zëdhënëse e VMRO-DPMNE-së.

Ndryshe, në konferencën për shtyp, Osmani e filloi fjalimin në gjuhën maqedonase, e më pas e përsëriti të njëjtën përmbajtje në gjuhën shqipe, që për të tashmë një periudhë të gjatë është praktikë.

Nga Ministria e Jashtme i mohojnë akuzat e opozitës. Nga atje thonë se gjatë festave të Pashkëve, VMRO-DPMNE-ja krijon tensione dhe ndarje etnike në shoqëri përmes përdorimit të gënjeshtrave dhe fakteve të sajuara.

“Zbatimi i Ligjit për Gjuhët në të gjitha ngjarjet e organizuara nga Ministria e Punëve të Jashtme, të cilat janë të shpeshta, publike dhe të shumta, zbatohet gjithmonë në mënyrë të duhur. Në çdo ngjarje, ministri i drejtohet publikut vendas në dy gjuhët zyrtare të përcaktuara me Kushtetutë dhe Ligjin për Gjuhët, ku Ministria siguron përkthim”, thonë nga Ministria e Punëve të Jashtme.

Nga MPJ-ja kërkuan që VMRO-DPMNE-ja të kërkojë falje dhe theksuan se përdorimi i gjuhëve zyrtare në vend është çështje e rregulluar me ligj dhe nuk duhet të jetë subjekt i kalkulimit politik. /Alsat.mk


Shtuar 17.04.2023 16:37