Braçe kërkon ndryshim të ligjit për BSH-në
Pëlqej
Kryetari i Komisionit të Ekonomisë, Erjon Braçe kërkoi sërish sot audit ndërkombëtar për të zbardhur abuzimet që janë bërë në Bankën e Shqipërisë.

Deputeti socialist njoftoi se do të kërkojë prej Kuvendit dhe qeverisë që të nisë procedurat dhe të realizojë një auditim nga kompani të huaja të gjithë veprimtarisë së Bankës së Shqipërisë.


“Dua të ndaj me ju detyrën për rishikimin e ligjit për Bankën e Shqipërisë, me qëllim çlirimin e Bankës së Shqipërisë nga interesat partiakë, politikë, interesat e korrupsionit e nepotizmit, klientelizmit, për ta pavarësuar realisht. Detyrën për të bindur autoritetet më të larta të Kuvendit e qeverisë për nevojën ulëritëse të një auditi ndërkombëtar në Bankën e Shqipërisë, prej vitesh e abuzuar dhe keqpërdorur dhe natyrisht kryerjen sa më parë të këtij auditi”, theksoi Braçe.

Lidhur me qëndrimin e Këshillit Mbikëqyrës të Bankës së Shqipërisë, Braçe theksoi se anëtarët e këtij këshilli nuk duhet të qëndrojnë në mbrojte të Guvernatorit.

“Tri javë nga vjedhja në Bankën e Shqipërisë, po ndodh që: Guvernatori absolut rri në krye të Bankës, edhe pse ka humbur gjithçka, moralin, besimin, autoritetin, fuqinë; Rri thjesht për shkak të mandatit! Këshilli Mbikëqyrës me fuqi të qarta ligjore rri nën Guvernatorin, për ta mbrojtur atë, edhe pse secili prej tyre ka humbur moralin, besimin, autoritetin, fuqinë; Rrinë thjesht për shkak të mandatit! Ligji e thotë qartë se Këshilli mund të shkarkojë në kushtet kur Guvernatori dhe anëtari i Këshillit cenojnë rëndë interesat e Bankës. Përse Këshilli nuk e shkarkon Guvernatorin? Është provuar qartësisht se Guvernatori, njëherësh anëtar e kryetar i Këshillit Mbikëqyrës, ka cenuar rëndë interesat e Bankës. Përse Këshilli nuk bën detyrën që i ka ngarkuar ligji në këtë rast? Te mos përmbushësh detyrën është faj, faji i radhës në një mori fajesh të tjera të rënda, që fajësojnë direkt edhe Këshillin”, tha kreu i Komisionit të Ekonomisë. /albeu.com/
Shtuar më 13/08/2014, ora 13:28
Shkruani komentin tuaj!
Të fundit nga kjo kategori