Braçe: Batërdi me dhënien vendburimeve të naftës privatit
Deputeti i Partisë Socialiste Erjon Braçe e ka quajtur batërdi transferimin e vendburimeve të naftës dhe gazit në administrim privatit. Përmes një postimi në Facebook, Brace shprehet se një praktike e tillë “rrufe” e dorëzimit të vendburimeve nuk ka ndodhur asnjëherë më parë.

“Batërdia vazhdon!! Tani në terren përmes transferimeve "rrufe". Vetëm 10 ditë pas miratimit në Qeverinë e Pushuar nga Puna të 9 Marrëveshjeve Hidrokarbure, të cilat, lëshojnë tek një privat 9 vendburimet e fundit të naftës dhe gazit nën administrim publik; Ferdinand Murati-drejtori politik i Albpetrol; Florion Mima-ministër politik për Ekonominë kanë urdhëruar: Dorëzimin e menjëhershëm brenda ditës së sotme të të gjitha vendburimeve, posaçërisht të vendburimeve të gazit në Frakull, Povelcë, Divjakë, Ballaj, Kryevidh!!! Nuk ka ndodhur në asnjë rast të mëparshëm të marrëveshjeve hidrokarbure kjo praktikë "rrufe" në dorëzimin e vendburimeve. Asnjëherë më parë”, shkruan Braçe në reagimin e tij.

Deputeti socialist i bën thirrje ministrit aktual të Ekonomisë, Florion Mima dhe drejtorit të “Albpetrol”, Ferdinand Murati të tërhiqen nga ky veprim. Ndërsa thekson se këto asete janë ende të listuara në një proces privatizimi të pambyllur dhe nga privatizimi i tyre rrezikojnë të mbeten të papunë mijëra punëtorë.

“Dua t’i bëj thirrje edhe një herë ministrit dhe drejtorit politik të “Albpetrol”: Tërhiquni! Ministër, ti me plot zë the tri ditë më parë se ministrat e mazhorancës së re do kenë mundësinë dhe të drejtën të hetojnë çdo letër koncesioni! Kështu të bëhet! Ti tërhiqu nga veprimet në terren para hetimit të praktikës!! Veçanërisht kur bëhet fjalë për asete, që ende janë të listuara në një proces privatizimi të pambyllur. Posaçërisht kur bëhet fjalë për mijëra punëtorë, që do të flaken në rrugë!!”, shkruan Braçe. /albeu.com/
Shtuar më 03/09/2013, ora 17:39
Shkruani komentin tuaj!
Të fundit nga kjo kategori