Berisha-Volonte: Rama po bllokon integrimin
Kryeministri Sali Berisha ka akuzuar kreun e PS-së Edi Rama se përmes një qëndrimi bllokues nuk pranon heqjen e imunitetit duke bllokuar kështu edhe marrjen e statusit kandidat për Shqipërinë.Këto deklarata kreu i mazhorancës i ka bërë gjatë takimit me Kryetarin e Grupit Parlamentar të Partisë Popullore Europiane në Asamblenë Parlamentare të Këshillit të Evropës Luca Volonte, të cilit i bëri se edhe pse mazhoranca i ka pranuar të gjitha kërkesat e opozitës për heqjen e imunitetit, kreu i PS-së është shprehur se nuk do ta votojë ligjin në Parlament.


"Ai për më shumë se 5 vjet e bllokoi heqjen e imunitetit duke kërkuar që kjo heqje të bëhet nëpërmjet ndryshimit të Kushtetutës. Kur ne pranuam heqjen e imunitetit nëpërmjet ndryshimit të Kushtetutës dhe dorëzuam në Parlament projektin e pregatitur nga KE dhe Euralius, z Rama nuk pranoi të votojë atë por kërkoi të votohet projekti i Partise Socialiste, i cili nuk lejonte arrestimin dhe kontrollin e banesës se deputetit pa miratimin e Parlamentit. Kur ne pranuam kërkesat e tij, zoti Rama përsëri deklaroi se nuk do të lejonte grupin të votonte me date 6 gusht heqjen apo kufizimin e imunitetit megjithse kjo datë eshte caktuar më datën 12 korrik si datë për votimin e heqjes së imunitetit me miratimin unanim të Parlamentit", deklaroi kryeministri Berisha.

Nga ana e tij, Zoti Volonte u shpreh se ky bllokim nga Zoti Rama i procesit të statusit është tejet i dëmshëm për shqiptarët dhe Shqipërinë. Zoti Volonte theksoi se zoti Rama në takimin e fundit me përfaqësuesit e Asamblesë Parlamentare të KE kishte akuzuar qeverinë se nuk pranon heqjen e imunitetit sepse me imunitetin mbron korrupsionin e zyrtarëve të saj kurse tani rezulton se është ai dhe opozita që duke bllokuar heqjen e imunitetit mbrojnë korrupsionin dhe bllokojnë marrjen e statusit të vendit kandidat në BE nga Shqipëria.

Luca Volonte në këtë takim vlerësoi lart qëndrimin parimor të mazhorancës për heqjen e imunitetit dhe përgëzoi kryeministrin Berisha për kompromiset e tij për të arritur në një projekt të përbashkët për këtë çështje me një rëndësi kapitale për vendin. /albeu.com/
Shtuar më 03/08/2012, ora 14:34

Shkruani komentin tuaj!
Të fundit nga kjo kategori