Berisha i tregon derën Ngjelës: Ik po deshe
Pëlqej
Albeu.com
Debat i ashpër mes kryeministrit dhe deputetit të PD Ngjela për mocionin. Avokat Ngjela duket se e këtë herë e ka “mbushur kupën” për Kryeministrin Berisha.Kreu i qeverisë, në mbledhjen e grupit parlamentarë të PD-së, kur diskutohej rreth mënyrës së votimit për mocionin për shkarkimin e kryetares së Kuvendit, Jozefina Topalli, nuk ka ngurruar t’i deklarojë Ngjelës se mund të largohet nga grupi parlamentar i PD-së dhe të dalë deputet i pavarur. Ky qëndrim i Berishës ka ardhur pas debateve të ndezura që ai ka pasur me avokat Ngjelën, për mënyrën e votimit ndaj mocionit të opozitës për shkarkimin e kryeparlamentares. Ngjela i cili është edhe kryetar i Komisionit Parlamentar të Ligjeve, ka deklaruar se votimi duhet të jetë i fshehtë me anë të kutive të votimit. Por Kryeministri mësohet se ka pasur tjetër qëndrim, duke qenë në favor të votimit të fshehtë në mënyrë elektronike. Praktikisht ky lloj votimi vetëm emrin ka të fshehtë, sepse në realitet është një lloj votimi tërësisht i lexueshëm.

Berisha
Deklarata e Berishës në adresë të Ngjelës se është i lirë të largohet nga grupi parlamentar i PD-së dhe të kalojë si deputet i pavarur, lë të kuptohet se Kryeministri ka vendosur më në fund të reagojë ndaj zërave ndryshe brenda grupit parlamentar të PD-së. Zgjidhja që ai ofron duke i kërkuar Ngjelës shikimin e mundësisë për t’u larguar nga grupi parlamentar i PD-së, bën të qartë se oponenca e vazhdueshme e Avokatit, ka filluar të bëhet “i padurueshëm” për kreun e ekzekutivit. Berisha mësohet se ka bërë të qartë se nuk mund të tolerojë më shumë kundërshtimet e vazhdueshme të Ngjelës për një seri nismash të qeverisë, duke i bërë të qartë edhe shikimin e mundësisë për ta larguar atë nga posti i kryetarit të Komisionit Parlamentar të Ligjeve. Kryeministri mësohet se e ka siguruar Ngjelën se edhe në rast se ai largohet nga grupi i PD-së, do të ruajë konsideratën e lartë për të. Lidhur me këtë përplasje, Berisha i tërheq vëmendjen Ngjelës në mënyrë lakonike se: “Avokati ka dhunti më të arrirë, sesa avokatinë e asaj që beson”.

Përplasjet
Avokat Ngjela ka qenë një nga deputetët më oponentë brenda PD-së, sa i përket një seri nismash të ndërmarra nga ana e qeverisë. Ka qenë pikërisht Ngjela ai që ka ngritur zërin ndaj veprimeve të Kryeministrit Berisha për projektligje të qeverisë apo deklarata të dhëna prej kreut të saj. Konflikti mes Berishës edhe Ngjelës e ka zanafillën katër muaj më parë, ku në një mbledhje të hapur të grupit parlamentar të PD-së, avokati replikoi me Berishën duke i thënë se lufta ndaj korrupsionit bëhet nga qeveria e cila duhet të sjellë një paketë të plotë masash kundër tij dhe jo nga Komisionet Parlamentare, ndërsa Berisha kërkonte që Komisionet Parlamentare e deputetët të kontribuonin me hartimin e projektligjeve për të luftuar këtë fenomen. Që pas kësaj ndodhie, mbledhjet e grupit parlamentarë të PD-së zhvillohen pa praninë e mediave. Sërish Ngjela disa muaj më vonë, doli kundër nismës së qeverisë për ndryshimin e rregullores së Kuvendit, që kërkonte që votimet për shkarkimin e anëtarëve të institucioneve të pavarura të bëheshin me votim të hapur, si dhe kundër shkurtimit të fondeve për institucionet e pavarura kushtetuese. Së fundmi, Ngjela së bashku me disa deputetë të maxhorancës e aleatë të qeverisë, kundërshtuan hapur nismën më të fundit të qeverisë për moratoriumin për pezullimin e lundrimit të mjeteve me motor.

Rastet e përplasjeve
Korrupsioni
Konflikti mes Berishës edhe Ngjelës e ka zanafillën 4 muaj më parë, kur avokati replikoi me Berishën duke i thënë se lufta ndaj korrupsionit bëhet nga qeveria, e cila duhet të sjellë një paketë masash kundër tij dhe jo nga komisionet parlamentare.
Institucionet
Ngjela doli kundër nismës së qeverisë për ndryshimin e Rregullores së Kuvendit, e cila kërkonte që votimet për shkarkimin e anëtarëve të institucioneve të pavarura, të bëheshin me votim të hapur. Ai ishte kundër shkurtimit të fondeve për institucionet e pavarura kushtetuese.

Largimi
Berisha nuk ka ngurruar t’i deklarojë Ngjelës se mund të largohet nga grupi parlamentar i PD-së dhe të dalë deputet i pavarur.

Posti
Kryeministri ka bërë të qartë se mund të ketë edhe shikimin të mundësisë për ta larguar Ngjelën nga posti i kryetarit të Komisionit Parlamentar të Ligjeve.

nga Armando Meta, Gazeta Shqiptare
Shtuar më 22/02/2006, ora 09:47
Tage: arkiv
Shkruani komentin tuaj!
Të fundit nga kjo kategori