Bashkimi Europian pret progres nga Shqipëria sa i përket procesit zgjedhor të 23 qershorit. Kështu u shpreh gjatë
mbledhjes së Këshillit të pestë të Stabilizim Asociimit BE-Shqipëri, Komisioneri për zgjerim në Bashkimin Europian Stefan Fule.

Fule kërkoi që vendi të vijojë me axhendën e reformave të kërkuara për të bërë të mundur ecjen përpara në rrugën e integrimit.

“Bashkimi Europian pret progres nga Shqipëria sa i përket procesit zgjedhor. Partitë politike janë përgjegjëse për mbarëvajtjen e zgjedhjeve të 23 qershorit. Ne do të dërgojmë ekipe për të vëzhguar zgjedhjet e qershorit dhe këto zgjedhjet do të jenë thelbësore për Shqipërinë” tha Fule.

Gjithashtu komisioneri Fule kërkoi një zgjidhje urgjente të situatës së krijuar në KQZ duke shtuar se kjo zgjidhje duhet të arrihet duke zbatuar kodin elektoral.


Ndërsa ministrja e Integrimit, Majlinda Bregu ka theksuar se qeveria është e angazhuar për plotësimin e standarteve në zgjedhjet e 23 qershorit.

“Do t’i përmbushim të gjitha detyrimet, përfshirë luftën kundër korrupsionit. Tre ligjet duhet të votohen për të marrë statusin. Këshilli në dhjetor na paralajmëoi që këto 3 ligje duhet të votohen. Zgjedhjet na çojnë në hapjen e negociatave. Me rëndësi është që KQZ-ja i cili është autoriteti kryesor i administrimit të zgjedhjeve të bazohet në balancat politike. Kjo balancë ka ekzistuar në zgjedhjet e 2011-ës dhe duhet të funksionojë edhe në zgjdhjet e qershorit duke respektuar kodin elektoral që është shumë i rëndësishëm” u shpreh Bregu.