BDI, LSDM dhe DR, kundershtojne MPB-ne per aksionin policor
Albeu.com
Dyshime rreth mënyrës së vrasjes së katër shqiptarëve më 12 maj në afërsi të Svillares paraqitën mbrëmë në emisionin “Rruga Drejt” në Alsat përfaqësuesit politik të BDI-së, LSDM-së dhe DR-së.Gëzim Ostreni nga BDI hodhi poshtë qëndrimet e ministres së brendshme Gordana Jankullovska e cila në intervistë për ALSAT sqaroi aksionin policor.
“Në të gjitha ato mjete të gjetura aty nuk ka gërvishtje nga plumbat, gjë që nuk është e mundur, tjetra, kombi është i mbyllur, ajo thotë se këto janë kundërpërgjigjur, Kujt?, në fotografitë aty ne nuk pamë as trupat, nuk ka dritare kombja, mandej nëse është vrarë shoferi, ai nuk e hjekën këmbën prej gazit, si ka ndejt aty kombi drejt. Versioni po flet ndryshe ndërsa fjalët që i thonë nuk përkojnë me atë që ka ndodh”, deklaroi Gezim Ostreni – anëtar i kryesisë së BDI-së.
Dyshime rreth rastit në fjalë paraqiti edhe ish ministri i mbrojtjes Vllado Buçkovski, i cili e quajti gënjeshtër deklaratën e Jankullovskës.
“Nuk është kontestuese se tre prej tyre që janë vrarë kanë dosje kriminale dhe të gjithë mbështesim se duhet të ballafaqohemi me kriminelët dhe ekstremistët, por në këtë mënyrë, kur ngjarja fabrikohet... lihet përshtypja që spekulimet të jenë më të besueshme se e vërteta. Policia në vend të parandalojë, më saktë politika të parandalojë, në cilin shtet policia ekzekuton, pa dallim kush të jetë i dyshuar për çfarëdo qoftë”, u shpreh Buçkovski.
Deputeti i DR-së Abedin Zymberi rastin e vrasjes së katër shqiptarëve e cilësoi si skenar të përgatitur në mënyrë amatore. Nuk është e mundur të gjuash mbi eksploziv e të mos shpërthejë-tha Zymberi. Sipas tij, fjalori i ministres Jankullovska po provokon shqiptarët.
“Gjithë ajo e gjuajtur armësh në kombi dhe ka eksploziv i cili pa pasur fitil ka mund të plasë aty ka pas mjete të armatimit aq të konsiderueshëm që vetëm koka e plumbit kur bjen aty ka pas mundësi të eksplodon. Aksioni i suksesshëm është kur ata njësi speciale janë në gjendje t’i kapin njerëzit pa i vra dhe t’i dorëzojnë që të mund të dëshmojnë se vërtetë kanë bërë një vepër të tillë apo jo. E gjithë kjo lë dyshimin se këtu ka qenë një skenar shumë i përgatitur por në mënyrë amatoreske e përgatitur”, tha deputeti Zymberi.
Ndërkohë Shoqata për mbrojtjen dhe afirmimin e identitetit kombëtar “Ilyricum Libertas” edhe një herë i bëri thirrje ministres së brendshme Jankullovska të lejojë ekspertizën e pavarur ndërkombëtare.
“I bëjmë thirrje, apel publik ministreshës, zonjës Gordana Jankullovska që të mos japë më deklarata të tilla pasi shihet qartë se vendi ka nevojë për ndihmë ndërkombëtare, vendi është ‘de fakto’ protektorat. Ne besojmë se vendi përkundrazi ka nevojë për ekspertizë ndërkombëtare, pikërisht në këtë rast, por jo vetëm këtu por edhe në raste tjera”, deklaroi Valon Kurtishi – kryetar i shoqatës “Ilyricum Libertas”.
Kurtishi tha se nëse institucionet vendore nuk i përgjigjen kërkesës së tyre për ekspertizë të pavarur. Shoqatat joqeveritare do të kërkojnë nga faktori ndërkombëtar të ndërhyjë në zbardhjen e plotë të rastit të vrasjes së katër shqiptarëve. Ekspertizë të pavarur ndërkombëtare kanë kërkuar edhe PDSH-ja e Menduh Thaçit dhe Bardhyl Mahmuti kryetar i BDSH-së. (alsat-m)
Shtuar më 21/05/2010, ora 20:18
Tage: arkiv
Shkruani komentin tuaj!
Të fundit nga kjo kategori