Bashkia e Tiranës ka filluar aksionin me njëherë pas ardhjes së kryetarit të ri. Rreth 28 ndërtime pa leje janë bllokuar sot nga policia e bashkiake. Bashkia e Tiranës ka ndërmarrë një operacion në të gjitha njësit në kryeqytet për bllokimin e ndërtimeve pa leje.

Në një deklaratë për shtyp Bashkia e Tiranës thekson se gjatë kontrollit të ushtruar në 24 orët e fundit, gjithashtu janë zbuluar edhe 76 subjekte tregtare të paregjistruara si dhe 34 subjekte, që nuk kishin paguar hapësirën publike dhe ndaj tyre u morën masat ligjore.

Gjithashtu policia bashkiake ka bllokuar edhe 19 automjete të parkuara në mënyrë të kundraligjshme si dhe mori masa, për sigurimin e qetësisë në disa ambiente në kryeqytet, që vuanin nga ndotja akustike, kryesisht në zonën e ish-Bllokut.

Sipas Bashkisë së Tiranës pas publikimit të numrit të telefonit, qytetarët e Tiranës kanë bashkëpunuar me Policinë Bashkiake dhe kanë bërë me dhjetëra denoncime. /albeu.com/