Kreu i PD-së Lulzim Basha ka ndërruar shtëpi. Sipas publikimeve në media, ai ka ikur nga apartamenti i tij në katin e 12-të, pranë kullave afër stadiumit "Arena Kombëtare" dhe tashmë është zhvendosur kompleksin e vilave “Long Hill”, në periferi të Tiranës.

Zona në fjalë njihet për çmimet e shtrenjta dhe kushtet luksoze.

Një shtëpi në këtë zonë kushton mesatarisht 410 mijë euro, e ndërsa për ta marrë me qira kushton rreth 2.4 mijë euro në muaj.

Vilat në këto zonë janë kryesisht dy katëshe, me pishinë dhe në këtë zonë jetojnë diplomatë, bankierë dhe personazhe të njohura të biznesit.

Pikërisht akuza të tilla indirekte ndaj Bashës, PD nuk i ka pranuar.

Me një reagim zyrtar ata kanë sqaruar se në fakt Basha nuk po qëndron në një shtëpi me pishinë, por në një banesë më të vogël se ajo që Basha ka në pronësi, pasi shtëpia e tij është dëmtuar nga tërmeti.

PD përsa i përket zonës në fjalë nuk e përmend as për po e as për jo, por thjesht i quan trillime të qeverisë.

"Ne disa media është shpërndarë një dezinformim i qëllimshëm lidhur me banesën e kryetarit të PD Lulzim Basha. Pas disa dëmeve të shkaktuara nga tërmeti, banesa e zotit Basha do të duhet t’i nënshtrohet disa punimeve të domosdoshme. Për këtë arsye zoti Basha dhe familja e tij janë zhvendosur përkohesisht në një banese me qira, që nuk ka asnjë lidhje me fotot e rreme të shpërndara nga disa portale te kontrolluara nga qeveria. Banesa me qira e familjes se zotit Basha jo vetem nuk ka pishine, por është më e vogël sesa banesa e tij në rindërtim. Gjithçka tjetër është trillim i sponsorizuar nga qeveria", njofton PD.