Basha thirrje shqiptarëve në Mal të Zi: Votoni masivisht
Kryedemokrati Lulzim Basha iu bën thirrje të gjithë shqiptarëve të Malit të Zi të marrin pjesë masivisht në zgjedhjet parlamentare të 30 gushtit.

Përmes një mesazhi në ‘Facebook’, Basha thekson se përmes votës së tyre për partitë shqiptare, ata mund të sigurojnë mbrojtjen e të drejtave dhe interesave të tyre dhe të garantojnë një të ardhme më të mirë për fëmijët e tyre.

Mesazhi i Bashës:

Ju bëj thirrje bashkëkombësve tanë në Mal të Zi që të dalin masivisht në zgjedhjet parlamentare të 30 gushtit dhe të votojnë listat shqiptare.

Të dashur motra dhe vëllezër, nëpërmjet votës tuaj për partitë shqiptare, ju mund të siguroni mbrojtjen e të drejtave dhe interesave tuaja dhe të garantoni një të ardhme më të mirë për fëmijët tuaj.

Ne krenohemi me faktin që shqiptarët në Mal të Zi kanë luajtur rol kyç në arritjen e pavarësisë së Malit të Zi dhe në përmbushjen e aspiratës së anëtarësimit në NATO. Jam i bindur që faktori politik shqiptar do të vazhdojë që në mënyrë konstruktive të japë kontribut të çmuar në përshpejtimin e integrimit europian të Malit të Zi.

Forcimi i përfaqësimit të partive shqiptare në parlament, është një kontribut i shtuar për paqen dhe stabilitetin në vend, për garantimin e të drejtaveshqiptarëve në Mal të Zi dhe për integrimin europian të vendit dhe mbarë rajonit.
Shtuar më 26/08/2020, ora 14:59

Shkruani komentin tuaj!
Të fundit nga kjo kategori