Basha: Kur të vij unë në pushtet, paratë e vjedhura do t'u kalojnë shqiptarëve
Kreu i PD Lulzim Basha vijon me turin e tij në qytete të ndryshme në prag të protestës së gjashtë kombëtare të opozitës së bashkuar, e programuar për ditën e shtunë, ora 19:00.

Ndalesa e fundit e liderit të opozitës ka qenë qyteti i Vorës.

Gjatë fjalës së tij, Basha u shpreh se, kjo është një betejë pa kthim dhe gjithçka që bëhet nuk është për karriken e tij.

Ai premtoi edhe një herë se do të anullohen të gjitha koncensionet dhe kontratat korruptive të kësaj qeverie.

“Zot në këtë vend janë qytetarët dhe jo hajdutët. Senat dhe president të zgjedhur nga populli. Referendume për të gjitha çështjet që kanë lidhje me jetën tuaj. Reformë të thellë që mos lejohet asnjë parti të mbetet peng i krimit dhe i një grushti oligarkësh, që janë ulur të babëzitur në tryezën e Ramës”, u shpreh Basha.

“Ne do ta bëjmë realitet anullimin e çdo koncensioni e kontrate korruptive. Do ti paguajnë një për një pas e do ti kthejmë në pensione. Minimali do të jetë 250 mijë lekë në 4 vitet e para”, vijoi kreu i PD.
Shtuar më 23/05/2019, ora 18:52
Shkruani komentin tuaj!
Të fundit nga kjo kategori