Kryetari i Kuvendit z. Ilir Meta vlerësoi sot kontributin e Presidentit të Komisionit Evropian z. José Manuel Barroso për punën e palodhur të Komisionit Evropian në mbështetje të Shqipërisë dhe axhendës së saj evropiane, duke theksuar njëkohësisht se Kuvendi do të jetë platforma e dialogut politik dhe gjithëpërfshirjes, në funksion të reformave kyçe për të cilat ka nevojë Shqipëria dhe qytetarët e saj.


Gjatë takimit që Presidenti i Komisionit Evropian pati me Metën, ai u shpreh se pas miratimit të statusit të vendit kandidat, Bashkimi Evropian do t’i kushtojë gjithnjë e më tepër vëmendje Shqipërisë dhe ecurisë së axhendës së saj evropiane. Në këtë kontekst, z. Barroso vlerësoi se roli i Kuvendit dhe aktiviteti parlamentar merr një dimension të rëndësishëm të ardhmen evropiane të vendit.

Kryetari Meta dhe Presidenti Barroso diskutuan gjithashtu mbi zhvillimet në rajon, ku u evidentua roli i vazhdueshëm konstruktiv i Shqipërisë në funksion të paqes, stabilitetit dhe zhvillimit ekonomik rajonal si dhe rëndësia e forcimit të perspektivës evropiane për të gjithë vendet e rajonit.

Pas takimit, Kryetari i Kuvendit z. Ilir Meta e ftoi Presidentin e Komisionit Evropian z. José Manuel Barroso të mbajë një fjalë përshëndetëse në Seancë të Posaçme Plenare.