Asnjë gjurmë nga shtetasi me inicialet J.M., i dyshuar si vrasës i dytë i bandës së tritolit. Mësohet se ai ka braktisur banesën e tij në Vlorë.

Gazeta Shqiptare shkruan sot se Julian Sinanaj ka dëshmuar se J.M. e ka njohur përmes kushërinjve Mëhillaj, të cilët i kanë thënë se ai do e ndihmonte Sinanajn me makinat dhe motorët që do të përdorte për të kryer atentatet. Për këtë arsye, grupi hetimor kërkon që të marrë në pyetje J.M., për të kuptuar rolin e tij brenda bandës. Ky i fundit rezulton si person me precedentë penalë, pasi është arrestuar për armëmbajtje pa leje dhe për plagosjen e një efektivi policie.

Pas arrestimit, siç bëhet me dije nga grupi hetimor, i dyshuari si vrasës me pagesë, është marrë në pyetje lidhur me atentatin ndaj një efektivi policie në vitin 2011, i cili mbeti i plagosur në kokë. Por, gjatë dëshmisë së tij, Julian Sinanaj e ka mohuar faktin që ai të kishte lidhje me një ngjarje të tillë.

Për këtë ngjarje është arrestuar J.M. dhe, nisur nga fakti që ai është lënë i lirë pas një kohe të shkurtër, ka lindur dyshimi se Sinanaj mund të ketë bashkëpunuar me J.M. në atë kohë. /albeu.com/