Aleksandër Arvizu, ambasadori i SHBA-së në Tiranë ka vlerësuar deklaratat e opozitës se do të marrë pjesë në Kuvend. Pjesëmarrja e opozitës në Kuvend do të bëjë të mundur plotësimin e reformave të rëndësishme për vendin dhe në këtë mënyrë do të përshpejtojë edhe integrimin e Shqipërisë në Bashkimin Europian, ka deklaruar Arvizu pas një takimi me kreun e PS-së.

“Rama më informoi për axhendën politike të opozitës. Ai është shprehur shumë i hapur për dialog. Pjesëmarrja e opozitës në Kuvend është forma më e mirë e diskutimit për reformat e rëndësishme” ka shtuar Arvizu.

Gjatë takimit ata kanë diskutuar edhe axhendën e opozitës në Parlament, axhendën e integrimit te vendit në BE dhe për shumë çështje të rëndësishme në Shqipëri, ka bërë të ditur ambasadori Arvizu.

Dy ditë më parë ambasadori amerikan u kërkoi partive politike të mos bëhen pengesë për reformat. /albeu.com/