Artan Lame nuk pyet për urdhrin e Komitetit Teknik: Ceremoni për humbjen e babait
Edhe pse ditën e djeshme u vendos ndalimi i grumbullimeve me më shumë se 10 persona, përfshirë edhe ceremonitë mortore, Artan Lame ka vendosur të thyejë rregullat ndërsa ka njoftuar se do të presë njerëz për babain e tij, i cili një muaj më parë i ndërroi jetë nga Covid.

Njoftimin, kreu i Kadastrës, Artan Lame e ka bërë në Facebook, duke dhënë arsyen se ka marrë 1100 mesazhe ngushëllimi për vdekjen e babait.

“Unë kam faqe timen në fb prej nja 15 vjetësh dhe mund të kem marrë e shumta nja 300 a 400 mesazhe për ndonjë postim.

Ti asnjëherë nuk pate fb, por mora 1100 mesazhe për ikjen tënde.

Ato ditë nuk mundëm të bëjmë adetet siç duhet, ndaj bashkë me mami Djanën dëshirojmë që të të kemi mes nesh duke të kujtuar me sa më shumë njerëz që të kanë njohur.

Miq, Të premten dhe të shtunën, në datat 20 dhe 21 nëntor, nga ora 11:00 deri 20:00, në saletën e Restorant Piazza prapa Muzeut Kombëtar, do të presim vizita. Ju lutem respektoni masat antikovid”, shkruan Lame në Facebook.

Ndërkohë në urdhrin e datës 17 nëntor, Ministria e Shëndetësisë thotë se “ndalohen grumbullimet me më shumë se 10 persona, në vende të mbyllura apo të hapura, konferencat, tubimet, mbledhjet partiake, ceremonitë e festave, ceremonitë martesore dhe organizimet përtej familjare të ceremonive mortore”.



Shtuar më 18/11/2020, ora 10:17

Shkruani komentin tuaj!
Të fundit nga kjo kategori