Ambasada amerikane reagon ndaj vendimit për Tahirin
Ambasada Amerikane e cilëson vendimin e dhënë një ditë më parë nga Gjykata për Krimet e Rënda, për ish-Ministrin Saimir Tahiri si tregues se pavarësia e gjyqësorit po vjen në rritje.

“Vendimi i djeshëm kundër ish-Ministrit të Brendshëm Saimir Tahiri demonstron pavarësinë në rritje të gjyqësorit dhe fillimin e fundit të pandëshkueshmërisë për personat me lidhje të forta”.

Megjithatë në reagimin e saj, Ambasada e SHBA thotë se ky vendim është shkurajues, duke pasur parasysh sa të rënda ishin akuzat ndaj tij.

“Ndërkohë që dënimi i zotit Tahiri për akuzën e shpërdorimit të detyrës sinjalizon një hap të rëndësishëm përpara, dënimi është shkurajues, duke pasur parasysh se sa të rënda ishin akuzat. Ata që shpërdorojnë besimin publik dhe shkelin ligjin duhet të përballen me pasoja domethënëse”.

Shtetet e Bashkuara, thuhet më tej në reagim, do të vazhdojnë të mbeten partnerë të Shqipërisë, në mbështetje të përparimit të mëtejshëm të reformës në drejtësi, transparencës dhe qeverisjes së mirë.

Mbrëmjen e së enjtes, gjykata dha vendimin me 5 vite burg në total për ish-Ministrin e Brendshëm, por për shkak të gjykimit të shkurtuar, atij iu ul masa e dënimit me 3.4 vite burg dhe në përfundim iu konvertua në 3 vite shërbim prove.

Gjykata e dënoi Tahirin vetëm për akuzën e shpërdorimit të detyrës, duke i rrëzuar tre akuzat e tjera për trafik ndërkombëtar droge, pjesëmarrje në një grup të strukturuar kriminal dhe veprime të kryera në kuadër të këtij grupi.

Shtuar më 20/09/2019, ora 15:19

Shkruani komentin tuaj!
Të fundit nga kjo kategori