Akuzat e Zaganit për Tahirin, prokuroria pushon hetimet
Lidhur me pretendimet e ish oficerit të policisë, Dritan Zagani, se eprorët e tij favorizonin trafikantët apo pushonin hetimet për persona të lidhur me trafikun e drogës, kanë rezultuar të pavërteta. Ky ka qënë përfundimi i Prokurorisë së Fierit, pas hetimeve të deklaratave të dy muajve më parë në media të Zaganit për përfshirjen e të afërmve të ministrit të Brendshëm, Saimir Tahiri, në "trafik droge".

Organi i Akuzës ka vendosur të pushojë këto hetime, për mungesë të elementëve të veprës penale dhe provave. Në vendimin e prokurores së Fierit, Eglantina Shehu, është argumentuar dhe shkaku i pushimit të këtyre hetimeve. Me hetimet e kryera nga kjo prokurore, ka rezultuar se të gjitha informacionet e hedhura nga Dritan Zagani në sistemin MEMEX (sistem i brendshëm komunikimi në Policinë e Shtetit) nuk përmendet shtetasi A.D., të cilin ai e ka përmendur në denoncimin në media.

Nga regjistrat e Policisë së Fierit, nuk rezulton që kusherinjtë Habilaj të ministrit Tahiri të jenë shoqëruar në komisariatin e Fierit, së bashku me automjetin Audi AA003 GB në pronësi të ministrit, por që përdorej prej tyre. Me vendimin e pushimit të hetimeve janë njohur palët e përmendura nga Zagani, në denoncimin publik dhe një kopje e tij i është dërguar prokurorit të Përgjithshëm, Adriatik Llalla. /albeu.com/
Shtuar më 22/01/2016, ora 17:13
Shkruani komentin tuaj!
Të fundit nga kjo kategori