Agolli porosit Ramën; Mos bëj gabimet që bëri Berisha
Kryetari i Partisë Socialiste, Edi Rama, i shoqëruar nga deputeti socialist Spartak Braho vizituan dje shkrimtarin e njohur, Dritëro Agolli. Pasi e ka uruar Ramën për fitoren e arritur në zgjedhjet e 23 qershorit, Dritëroi nuk ka kursyer dhe porositë për një qeverisje sa më të suksesshme.

Mësohet se Dritëroi e ka këshilluar Ramën të mos bëjë disa gabime të bëra nga qeveritë e mëparshme, ndërsa i ka kërkuar që ai vetë dhe ministrat e tij të jenë sa më afër me popullin dhe sa më të përulur. “Vetëm kështu populli do ju vlerësojë dhe do t’ju votojë sërish”, mësohet t’i ketë thënë ai.


Një tjetër temë e bisedës sipas gazetës Panorama ishte dhe ajo e Shtëpisë Qendrore të Ushtrisë. Dritëroi mësohet t’i ketë thënë Ramës se ajo i përket Ushtrisë dhe duhet t’i kthehet.

Rama është shprehur i vendosur se do t’ia kthejë Forcave të Armatosura godinën si simbol të Ushtrisë shqiptare dhe jo thjesht si godinë. Shkrimtari i njohur ka përgëzuar Ramën për nismën e tij për të ruajtur gjuhën shqipe në të gjithë dokumentacionin zyrtar të institucioneve shtetërore. “Vendimi i parë si kryeministër, ka thënë Rama, do të jetë vendosja e redaktorëve të gjuhës shqipe në të gjitha institucionet që të mos kalojë asnjë dokument pa u redaktuar më parë në shqipen standarde”. Dritëroi i ka kujtuar Ramës se Franca është shumë e ashpër në ruajtjen e gjuhës. “Në Francë, ai zyrtar që bën gabime në gjuhë gjobitet rëndë”, është shprehur Dritëroi.
Shtuar më 07/09/2013, ora 11:11
Shkruani komentin tuaj!
Të fundit nga kjo kategori