OSBE mbështet bashkëpunimin rajonal kundër korrupsionit në Evropën Juglindore
Në Durrës filloi sot një konferencë rajonale dyditore, që synon forcimin e bashkëpunimit kundër pastrimit të parave dhe në luftën kundër financimit të terrorizmit, si dhe korrupsionit, në Evropën Juglindore. Veprimtaria organizohet nga Prezenca e OSBE-së në Shqipëri dhe Zyra e Ko-ordinatorit të Veprimtarive Ekonomike dhe Mjedisore të OSBE-së, së bashku me Drejtorinë e Përgjithshme të Parandalimit të Pastrimit të Parave.



“Pastruesit e parave nuk i njohin kufijtë. Fatkeqësisht, institucionet shtetërore ende kufizohen prej tyre. Prandaj OSBE-ja përpiqet t'ju nxisë dhe t'ju mbështesë për të punuar përtej kufijve, për të bashkëpunuar për të arritur rezultatet e nevojshme,” tha Kryetari i Prezencës së OSBE-së në Shqipëri, Ambasadori Florian Raunig. “Për më tepër, trajtimi me vendosmëri dhe transparencë i rasteve të supozuara të korrupsionit, pavarësisht statusit të të akuzuarve është një tregues i rëndësishëm i autoritetit të shtetit dhe pavarësisë së përgjegjësisë së institucioneve të tij përpara qytetarëve”.



Konferenca mbledh zyrtarë të zbatimit të ligjit dhe të inteligjencës financiare nga Evropa Juglindore, si dhe ekspertë të OSBE-së. Ata do të shqyrtojnë, gjithashtu, rolin e njësive të inteligjencës financiare në luftimin e korrupsionit, si dhe mjetet specifike në dispozicion për të ndërmarrë hetime financiare në rastet e korrupsionit.



“Mjetet dhe institucionet që luftojnë pastrimin e parave dhe korrupsionit janë zhvilluar shumë, në mënyrë të pavarur nga njëra-tjetra”, tha Christian Larson, oficer programi për Bashkëpunimin Ekonomik dhe Qeverisjen në Sekretariatin e OSBE-së. “Gjithsesi, ekziston gjithnjë e më shumë dakordësia që agjencitë kundërkorrupsion dhe njësitë e inteligjencës financiare mund ta rrisin efektshmërinë e tyre duke punuar së bashku dhe ky është fakti që synon të vërë në pah kjo konferencë”.



Në kuadër të konferencës, do të zhvillohet edhe një takim i drejtuesve të njësive të inteligjencës financiare të Shqipërisë, Bosnjës dhe Hercegovinës, Kroacisë, ish-republikës jugosllave të Maqedonisë, Serbisë dhe Sllovenisë, ku do të diskutohet bashkëpunimi rajonal në luftën kundër pastrimit të parave.

Shtuar më 10/10/2013, ora 13:57
Shkruani komentin tuaj!
Të fundit nga kjo kategori