Masakra te shkencat/ Shqipëri-Hollandë grup të përbashkët hetimi
Një grup hetimor i përbërë nga prokurorë të Prokurorisë për Krime të Rënda Tiranë dhe të Prokurorisë së Roterdamit në Holandë, do të merren me çështjen e vrasjes së trefishtë të ndodhur në bulevardin "Zogu I" në fund të muajit maj.

Në këtë ngjarje ku humbën jetën Mentor Lufi, Durim Sulku dhe Gerti Goxhaj, sipas hetuesve e ka zanafillën në vrasjen e mëparshme të Ilirjan Sulkut në Roterdam të Holandës. Për shkak të lidhjeve mes dy ngjarjeve, është parë e arsyeshme që të ngrihet një grup i vetëm i përbashkët hetimor, në përbërje të të cilit do të jenë hetues nga të dyja palët.

Deri më tani sipas hetimeve të Prokurorisë së Krimeve të Rënda është bërë e mundur zbardhja e detajeve të reja në lidhje me vrasjen e ndodhur në Roterdam të Holandës, ngjarje që u bë shkak për ekzekutimin e tre personave në Tiranë. Autorët e vrasjes së Durim (Ilirjan) Sulkut në Holandë kanë përdorur një makinë të vjedhur tip "BMW", e cila është gjetur nga Policia holandeze

"Kjo makinë tip 'BMW', që është përdorur në vrasjen e Durim (Ilirjan) Sulkut, u gjet në një zonë të pjerrët pranë bregut të detit. Autorët kanë dashur ta hidhnin makinën në det, duke zbritur prej saj pasi e kishin përdorur në vrasje, por makina është fikur dhe ka mbetur pa rënë në det, pasi ishte lënë në marsh", thuhet në njoftimin e policisë.


Sipas tyre, autorët e vrasjes së Durim Sulkut kanë dashur të zhdukin në det armët dhe makinën e përdorur në kryerjen e vrasjes. Ndërkaq, Policia holandeze mendohet se disponon gjurmë gishtash të dy personave të arrestuar për vrasjen e Durim Sulkut në Tiranë. Gjurmët që mendohet se i përkasin Klejvi Doçit, janë gjetur pikërisht në makinën e përdorur në vrasje.

Një oficer kontakti i palës holandeze mësohet se ka qenë në Prokurorinë e Krimeve të Rënda për hetimin e vrasjeve të ndodhura në Holandë dhe në Shqipëri, të cilat dyshohet se kanë lidhje me njëratjetrën. Rreth një muaj më parë, Policia holandeze solli në Shqipëri edhe anëtarët e tjerë të grupit të hetimit që kontaktuan me Prokurorinë e Krimeve të Rënda.

Prokuroria është shprehur se ka dyshime të bazuara se shtetasit Markelian Doçi dhe Klejvi Doçi kanë marrë pjesë dhe kanë kryer në Holandë vrasjen e Durim Sulkut. Vrasja është kryer në shenjë hakmarrjeje për atentatin ndaj xhaxhait të tyre, viktimës Mentor Lufi(Doçi) në Tiranë, më datë 19.12.2014. /albeu.com/
Shtuar më 10/08/2015, ora 11:03

Shkruani komentin tuaj!
Të fundit nga kjo kategori