Apeli i deputetes Deda: Qeveria ka harruar Mirditën
Gjatë vizitës së saj në fshatin Domgjon të Mirditës, deputetja Albina Deda, akuzoi qeverinë se ka lënë në mëshirë të fatit dhe pa energji dhjetra banorë të zonave të thella të Mirditës, ku varfëria, mungesa e energjisë dhe i ftohti e kanë bërë të pamundur jetën e dhjetëra banorëve.

Në familjen e Gëzim Ndojit, me tre fëmijë të vegjël, mes të cilëve një foshnje tri muajsh, deputetja Deda pa mjerimin dhe mungesën e energjisë prej një viti, për shkak të pamundësisë së pagesave.

Kryefamiljari Gëzim Ndoj invalid, me të shoqen të papunë thanë se e kanë të pamundur të përballojnë jetën e përditshme pasi pensioni i invaliditetit është minimal. Deputetja e zonës Albina Deda tha se kjo qeveri e ka braktisur me arrogancë Mirditën dhe komunitetin e saj, duke mos bërë asgjë për familjet në nevojë.

"Institucionet vendore kanë lënë në mëshirë të fatit banorët tejet të varfër të kësaj zone duke i lënë dhe pa drita e kushte minimale të infrastrukturës. Shteti duhet të gjejë sa më parë rrugët e subvencionit për pagesat e energjisë dhe ndihmës ekonomike, në mënyrë që këto familje t'i kthehen një jetese të përballueshme", e mbyll fjaën e saj deputetja Deda. /albeu.com/
Shtuar më 17/01/2016, ora 14:06

Shkruani komentin tuaj!
Të fundit nga kjo kategori