Sekuestrohen mallra kontrabandë, shpallet në kërkim administratorja e postës private në Tiranë

Policia e Tiranës ka goditur një rast të mallrave kontrabandë dhe ka shpallur në kërkim administrtatoren e postës private.

Gjithashtu ka nisur procedimi në gjendje të lirë për 3 persona të punësuar për tregtimin dhe shpërndarjen e mallrave të kontrabanduara.

Në kuadër yë operacionit policor “Pakot postare 2” u bë shpallja në kërkim e shtetases A. D., 32 vjeçe, banuese në Tiranë, administratore e një poste private.

Gjithashtu, nisi procedimi në gjendje të lirë për shtetasit L. M., 37 vjeç, A. K., 22 vjeç dhe A. A., 40 vjeç, të tre banues në Tiranë, punonjës të kësaj poste.

Gjatë kontrollit të magazinave të postës në administrim nga shtetasja A. D., shërbimet e Policisë gjetën dhe sekuestruan, në cilësinë e provës materiale, 93 pako me mallra të ndryshme (veshje, produkte kozmetike, pajisje elektronike etj), pa fatura tatimore shoqëruese apo deklarata doganore për origjinën e mallrave.

Nga veprimet hetimore dyshohet se mallrat e sekuestruara janë futur kontrabandë në Shqipëri. Vijon puna hetimore për dokumentimin e plotë të kësaj veprimtarie të kundërligjshme.

Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale./Albeu.com/


Shtuar 9.03.2023 09:20