Qeveria ndan 80 mijë $ për kurimin e Shpëtim Saraçit
Këshilli i Ministrave ka miratuar dje, një fond prej 12 milionë lekësh për kurimin jashtë shtetit të tre personave, mes të cilëve edhe kompozitorit Shpëtim Saraçi. Për mbulimin e shpenzimeve shëndetësore të muzikantit Saraçi, qeveria ka vënë në dispozicion nga buxheti i shtetit shumën prej 8 170 000 lekësh, ndërsa për dy qytetarët e tjerë, Gëzim Dibra dhe Oriana Nusha, përkatësisht, 3 287 000 lekë dhe 650 000 lekë.

"Këshilli i Ministrave vendosi që Ministrisë së Shëndetësisë, në buxhetin e miratuar për vitin 2013, zëri ‘Mallra dhe shërbime’, t’i shtohet fondi prej 3 287 000 lekësh, për mbulimin e pjesshëm të shpenzimeve të kurimit të z. Shpëtim Saraçi", shkruhet në vendimin e qeverisë, ku përcaktohet që ky fond të përballohet nga fondi rezervë i Këshillit të Ministrave.

Pas disa ditësh kurim në qendrën spitalore "Nënë Tereza", kompozitori që është diagnostikuar me Ishemi Cerebrale do të niset për kurim jashtë vendit. Në mes të gushtit, kompozitori i njohur Shpëtim Saraçi ka qenë i shtruar pranë Shërbimit të Neurologjisë, në Qendrën Spitalore Universitare "Nënë Tereza".

Mjekët pohuan se Saraçi ka pësuar një ishemi dhe se gjendja e tij shëndetësore është përmirësuar. Shpëtim Saraçi është një nga kompozitorët më të njohur në vend. Kompozimet e tij mbajnë firmën e disa hiteve më të njohura pas viteve ’90-të, kënduar nga emrat më të mirë të muzikës shqiptare.

Vitet e fundit ai ka qenë drejtor artistik i Festivalit të Këngës në Radio Televizionin Shqiptar. Ndërkohë që në 2010-ën, kënga e kompozuar dhe orkestruar prej tij, "Kënga ime", e kënduar nga Aurela Gaçe, prezantoi Shqipërinë në "Eurosong".

Ai është i martuar me këngëtaren Mira Konçi dhe nga martesa e tyre kanë lindur dy fëmijë. /albeu.com/
Shtuar më 06/09/2013, ora 11:50
Shkruani komentin tuaj!
Të fundit nga kjo kategori