Duket se të drejtat e njeriut në Rusi janë në pikën më të ulët prej shumë vitesh.
Një grup djemsh, ndër milionerët më të rinj të Rusisë dhe pronarë të supermakinave luksoze janë arrestuar nga policia ruse, madje duke u tërhequr edhe zvarrë nga eventi që kishin organizuar për të promovuar mjetet e tyre në Moskë.
Sipas mediave të huaja, djemtë po merrnin pjesë në eventin e quajtur ‘të pasur dhe të suksesshëm’ në rrugët e Moskës, por policia ka ndërhyrë për të goditur shfaqjen ekstravagante të pasurisë.
Videot e publikuara në rrjet tregojnë se si policia u vërsul kundër shoferëve të pasur që po ekspozonin rreth 170 Lamborghini, Rolls-Royce Phantom, Ferrari, Porsche, Hummer H1, Chevrolet Corvette C8, Audi RS5 dhe Bentley Continental GT II në Moskën perëndimore.
Të rinjtë e arrestuar synonin të parakalonin me makinat e tyre në qendër të Moskës me afishe “Të pasur dhe të suksesshëm”. Biletat për tubimin jozyrtar kushtonin deri në 4,200 £ duke përfshirë një mëngjes dhe një festë pas xhiros, por policia e shkatërroi atë përpara se të fillonte siç duhet.
Një i kapur nga policia ishte Oscar Liksutov, 17 vjeç, djali i Maksim Liksutov, kreut të Departamentit të Transportit të Moskës. Ai nuk u ndalua, por u shoqërua në shtëpinë e zyrtarit të lartë të qytetit.
Organizatori i eventit Alexei Khitrov, një milioner 28-vjeçar i lidhur me biznesin e kriptomonedhave, ka thënë se mendoi që ndërhyrja e policisë ishte shaka.
“Qëllimi i këtij eventi është të mbledhë të gjithë pronarët e makinave elitare dhe të krijojë një atmosferë. Kur policia hyri brenda në fillim mendova se ishte një shaka. Pyeta se kush e kishte urdhëruar goditjen”, tha ai.
Një burim i zbatimit të ligjit tha për TASS: “Aktualisht, disa nga pjesëmarrësit janë identifikuar. Ata do të dërgohen në polici për hetim”.
Policia në Moskë pretendoi se nuk ishte dhënë leje për tubimin elitar, ndërsa Vladimir Putin dihet se zemërohet kundër multimilionerëve rusë dhe pasardhësve të tyre, të cilët shfaqin në mënyrë të dukshme pasuritë e tyre para popullit.
“Në kohët sovjetike, disa njerëz e shfaqnin pasurinë e tyre duke implantuar dhëmbë ari, idealisht dhëmbë të përparmë, në mënyrë që të demonstronin madhësinë e pasurisë së tyre. Lamborghini dhe lodra të tjera të shtrenjta janë pikërisht ata dhëmbë ari”, ka thënë para pak kohësh Presidenti rus.
DailyMail sqaron se aksioni i policisë ka qenë i justifikuar me idenë se rusët nuk mund të dhurojnë shfaqje luksi, në një kohë që një numër i madh ushtarësh po vdesin në luftën në Ukrainë dhe ekonomia është në krizë.
Ndërkohë, zemërimi për eventin e kushtueshëm bëri që një senator kryesor pro-Putin të bënte thirrje që të arrestuarit të dërgoheshin për t’iu bashkuar ushtrisë në luftën në Ukrainë.
“Ata duhet të thirren për të ndihmuar ushtrinë”, tha senatori Mikhail Dzhabarov.
