Hstoria frymëzuese e fashionistes shqiptare: Kufijtë nuk i vendos trupi, por mendja (FOTO LAJM)

Ajo quhet Ardonita Sabedini. Është 23 vjeç dhe jeton në Gjilan të Kosovës, qyteti ku edhe ka kryer gjimnazin. Shkollën e lartë Ardonita e ka mbaruar në Prishtinë për dizajn dhe modë, një degë që ajo e ka pasur pasion që në fëmijëri. Menjëherë pas përfundimit të studimeve ka filluar punë në qytetin e lindjes. Deri këtu asgjë e re do të thoni ju, sa vajza kanë ëndërr të bëhen stiliste dhe të veshin të “bukurat e spektaklit dhe showbizzit ”? E vërtetë, por ajo çka e bën Ardonitën të veçantë është guximi, forca, dëshira dhe qëllimet për t’i realizuar këto ëndrra edhe kur gjatësia trupore e vështirëson diçka të tillë.

Siç më ka rrëfyer edhe ajo vetë “ Përmasat trupore më kanë bërë të dyshoj se ndoshta nuk mund të realizoj ëndrrat e mia dhe ndonëse ka qenë e vështirë jam munduar të thyej barriera”.
Kur e pyeta Ardonitën se çfarë e frymëzon, ajo u përgjigj: “ Vetja.”, dhe me thënë të drejtën m’u duk një përgjigje aspak modeste, por më pas e kuptova që te vetja ajo gjen forcën e individit, forcën e pashtershme të gruas, duke mos i marrë merita as natyrës apo karakterit të saj. Ardonita thotë që në këtë rrugëtim të deritanishëm, ajo është përballur shpeshherë me paragjykime për përmasat e trupit të saj, paragjykime që e kanë bërë të dyshojë tek dhuntia e saj, por puna e shumtë dhe krenaria e kanë bërë që mos të heqë dorë.

Natyrisht që vështirësitë për një person që vuan nga nanizmi janë të shumta, ndonjëherë edhe në jetën familjare, por dhe në atë jashtë saj. Megjithatë Ardonita si moment më të vështirë cek humbjen e të atit, i cili ka qenë dhe një nga nxitësit e saj më të mëdhenj. Të gjitha vështirësitë si çdo njeri tjetër në tokë ajo i ka tejkaluar falë ndihmës dhe mbështetjes së pakushtëzuar të familjes, por dhe të miqve të saj të mirë.
Kur vendosa të bëj intervistën me Ardonitën mendoja që pasioni i saj për veshjet, dizajnin dhe modën kishte lindur për shkak të nevojës që ajo kishte për veshje të bukura të përmasave të saj. Në fakt ajo thotë që pasioni apo dëshira për të qenë stiliste ka lindur që në vegjëli, jo sepse është ndryshe nga shumica apo si nevojë individuale. Veshja e parë e realizuar nga ajo, ka qenë një fustan i zi i realizuar për një sfilate mode në Prishtinë, fustan të cilin ajo ende ruan me kërshëri.

Zakonisht ajo gjen inspirim në natyrë, në atë që e rrethon, në ndonjë ndërtesë apo godinë që frymëzon një koncept të caktuar që më pas e realizon, ndonëse më shumë preferon të stilojë veshje Haute-Couture.
Në planet dhe qëllimet e të ardhmes gjejmë dhe një koleksion për personat me aftësi ndryshe, por do t'i pëlqente gjithashtu të hapte shtëpinë e saj të modës.
Të gjitha këto motivohen gjithashtu nga dëshira për të ndihmuar dhe shumë persona të tjerë me aftësi ndryshe, që mos të bëhen pengesë për veten dhe mundësitë e tyre, por që ta jetojnë jetën duke guxuar dhe pa frikë. Megjithatë nuk mund të lë pa cituar dhe fjalët e vetë Ardonitës që thotë: “ Qëllimi im i vetëm është që të jem një vajzë e zonja për veten time”.
U habita kur mësova që Ardonita ka një marrëdhënie shumë të mirë me rrjetet sociale, ajo thotë që përgjigjia e ndjekësve ndaj punëve që ajo poston është gjithmonë e mirë dhe pozitive. Ndoshta ngaqë dhe vetë është e tillë, nuk përmend aspak episode të pakëndshme ose bullizmi duke thënë vetëm me shumë krenari “ Nuk mund të ngresh imazhin tënd duke ulur atë të dikujt tjetër”. Biseda me të, ndonëse virtuale, më la një shije të mirë, sidomos kur dëgjova që ajo ka një jetë shumë aktive, është një vajzë më shumë vullnet, që në fund të ditës ndihet mirë në lëkurën dhe në jetën e vet.

Në fund nuk mund të lë pa transmetuar dhe mesazhin e saj për të gjitha vajzat apo personat me aftësi ndryshe që thotë: “ Gjithmonë duhet të mundohesh të ndihesh mirë sepse jeta nuk duhet kaluar në trishtim. Unë jam e vogël në trup, por dua të frymëzoj botën, pa u ulur dhe pa vuajtur për dëmtimet apo aftësitë e mia. Nuk e kam mbajtur kurrë kokën poshtë, sepse besoj që paaftësia nuk është në trup, por në mendje. Ndihu krenare për atë që je dhe mos e shiko veten më sytë e të tjerëve”./Nga Zhaklin Lekatari.

Shtuar më 08/01/2021, ora 11:10

Shkruani komentin tuaj!
Të fundit nga kjo kategori